देशभक्तीच्या देखाव्यावर भाष्य

स्वातंत्र्य दिन व प्रजासत्ताक दिनाच्या निमित्ताने अनेक जण देशप्रेमाचं बेगडी प्रदर्शन मांडतात. आपल्या राष्ट्रध्वजाच्या प्रतिकृती त्या-त्या दिवसापुरत्या देखाव्यासाठी मिरवून दुसऱ्या दिवशी वाटेल तेथे टाकून दिल्या जातात.

मुंबईतील एनकेइएस महाविद्यालयातील विद्यार्थ्यांनी गेल्या वर्षी खास स्वातंत्र्य दिनानिमित्त बनवलेला ‘सम्मान’ हा हिंदी लघुपट अत्यंत महत्त्वाच्या मुद्द्याला हात घालतो. एका शाळकरी मुलाच्या मनात राष्ट्रध्वजाबद्दल काय येतं, ते या कलाकृतीतून प्रभावीपणे मांडण्यात आलं आहे.

लघुपटाच्या सुरवातीला मोठा भाऊ दुधात कुठलासा बाजारू पदार्थ मिसळून ते पिताच, चेहरा कसनुसा करतो. ‘‘या पदार्थाची एक्स्पायरी डेट संपली आहे गं आई. मला नको हे दूध,’’ असं सांगतो.

धाकट्या भावाला शाळेत सोडून तो महाविद्यालयात जाणार असतो. वाटेत धाकटा त्याला, ‘‘एक्स्पायरी डेट म्हणजे काय,’’ असं विचारतो. ‘‘एका विशिष्ट मुदतीनंतर ती वस्तू किंवा पदार्थ कालबाह्य होतो,’’ असं उत्तर तो देतो. स्वातंत्र्य दिनाच्या निमित्ताने रस्त्यात लोक राष्ट्रध्वजाच्या प्रतिकृती मिरवत असल्याचं पाहून धाकटा स्वतःसाठी मागतो. थोरला त्याला दुकानातून छोटासा तिरंगा घेऊन देतो.

मुलाच्या मनातील भावतरंग

राष्ट्रध्वजाचा सन्मान राखण्याची कुवत तुमच्यात नसेल तर मग तो घेऊच नका,’ असाच धडा या लघुपटातून मिळतो. यातील मुलाच्या मनातील भावतरंगांवर आधारित हे आवाहन फार परिणामकारक आहे.