काँग्रेस-राष्ट्रवादीला पाठिंबा - अंधारे

पुणे - ‘आगामी निवडणुकीत भाजप सत्तेत आल्यास भविष्यात लोकशाही मार्गाने निवडणुका होणार नाहीत. त्यामुळे आताच या सरकारला सत्तेतून 
बाहेर काढण्याची गरज आहे. त्यासाठीच काँग्रेस-राष्ट्रवादी काँग्रेस आघाडीला पाठिंबा देत आहे,’’ अशी घोषणा गणराज्य संघाच्या सुषमा अंधारे यांनी मंगळवारी केली.

आंबेडकरी चळवळीतील संघटनांना एकत्र आणत आघाडीला पाठिंबा दिला. या वेळी बहुजन रिपब्लिक सोशलिस्टि पक्षाचे डॉ. सुरेश माने, अमोल मिटकरी, ऐक्‍यवादी रिपब्लिकन पक्षाचे नाना इंदिसे, मानवी हक्क अभियानचे डॉ. मिलिंद आव्हाड, युवा भीम सेनेचे पंकज काटे आदी उपस्थित होते.

आघाडीतील नेत्यांबरोबरील चर्चेनंतर पाठिंबा देण्याचा निर्णय आंबेडकरी चळवळीतील पक्ष आणि संघटनांनी घेतला. त्यामध्ये गणराज्य संघ, बहुजन रिपब्लिक सोशालिस्ट पक्ष, मानवी हक्क अभियान, युवा भीम सेना, प्रजासत्ताक रिपब्लिकन पक्ष यांच्यासह दहापेक्षा अधिक पक्ष आणि संघटनांचा समावेश आहे.