संविधान रॅली

NPT26B08645
नातेपुते (ता. माळशिरस) : येथील डॉ. बा. ज. दाते प्रशालेच्या वतीने काढण्यात आलेल्या संविधान रॅलीत सहभागी विद्यार्थी.
---
दाते प्रशालेच्या वतीने
संविधान रॅली उत्साहात
सकाळ वृत्तसेवा
नातेपुते, ता. ४ : भारतीय संविधान सप्ताहाच्या निमित्ताने येथील डॉ. बा. ज. दाते प्रशालेच्या वतीने शहरात भव्य संविधान रॅली काढण्यात आली. संविधानाविषयी जनजागृती आणि महापुरुषांना अभिवादन करण्याच्या उद्देशाने आयोजित केलेल्या या रॅलीत विद्यार्थ्यांनी मोठ्या उत्साहात सहभाग नोंदवला.
प्रशालेपासून सुरू झालेली ही रॅली पुणे- पंढरपूर रोड मार्गे नातेपुतेतील डॉ. बाबासाहेब आंबेडकर चौकात पोचली. येथे प्रशालेचे मुख्याध्यापक विनायक देशपांडे यांनी डॉ. बाबासाहेब आंबेडकर यांच्या पुतळ्यास पुष्पहार अर्पण करून अभिवादन केले. त्यानंतर विद्यार्थ्यांनी या चौकात संविधानाच्या महत्त्वावर आधारित पथनाट्य सादर केले, ज्याने उपस्थितांचे लक्ष वेधून घेतले. रॅली शहरातील मुख्य पेठेतून (मेन पेठ) संविधान चौकात आली. या ठिकाणी संविधानाच्या प्रतिमेस पुष्पहार अर्पण करण्यात आला. येथेही विद्यार्थ्यांनी संविधानावर आधारित नाटिका सादर करून लोकशाही आणि हक्कांची माहिती दिली.
यानंतर सर्व विद्यार्थ्यांनी पोलिस स्टेशनला भेट दिली. पोलिस प्रशासनाचे कामकाज कसे चालते आणि कायद्याची अंमलबजावणी कशी होते, याची माहिती विद्यार्थ्यांनी यावेळी करून घेतली. या उपक्रमासाठी प्रशालेचे मुख्याध्यापक विनायक देशपांडे, सर्व शिक्षक आणि विद्यार्थ्यांनी परिश्रम घेतले.