बाप रे, जुन्नरमधील कोरोनाबाधित ४२ जणांच्या संपर्कात 

नारायणगाव (पुणे) : प्रशासनाला गुंगारा देत मुंबई येथुन जु्न्नर तालुक्यातील धनगरवाडी येथे आलेला कोरोनाबाधित तरुण परिसरातील ४२ जणांच्या संपर्कात आल्याने कोरोनामुक्त असलेल्या धनगरवाडी, नारायणगाव  परिसराची चिंता वाढली आहे. 

या रुग्णांच्या संपर्कात आलेल्यांपैकी बारा जणांना लेण्याद्री येथील केंद्रात तपासणीसाठी पाठवण्यात आले असून, तीस जणांना होम क्वारंटाइन करण्यात आले आहे. खबरदारी म्हणून नारायणगाव येथील बाजारपेठ पुढील दोन (शनिवार, रविवार) दिवस बंद ठेवण्याचा निर्णय आज झालेल्या व्यापारी असोसिएशनच्या बैठकीत घेण्यात आला, अशी माहिती सरपंच योगेश पाटे वैद्यकीय अधिकारी डॉ. वर्षा गुंजाळ यांनी दिली.

पुण्याच्या बातम्या वाचण्यासाठी येथे ► क्लिक करा

धनगरवाडी येथे आज आढळुन आलेला कोरोनाबाधित रुग्ण १८ जून रोजी मुंबई येथून आला होता. प्रशासनाला माहिती न देता तो मागील सहा दिवस धनगरवाडी, नारायणगाव परिसरात फिरत होता. तो नारायणगावातील काही व्यक्तींच्या संपर्कात आल्याने गावची चिंता वाढली आहे. 

ताज्या बातम्यांसाठी डाऊनलोड करा ई-सकाळचे ऍप   

तालुक्यातील जुन्नर, ओतूरसह वीस गावात ५१ कोरोना बाधित रुग्ण आढळून आले आहेत. नारायणगाव ही तालुक्यातील मुख्य बाजारपेठ आहे. कोरोनाचा संसर्ग टाळण्यासाठी ग्रामपंचायत, आरोग्य विभाग, नारायणगाव पोलिस स्टेशन व इतर प्रशासकीय कर्मचारी यांनी कडक अंमलबजावणी केल्यामुळे सुमारे साठ हजार लोकसंख्या असलेली नारायणगाव व वारूळवाडी ही मोठी दोन गावे आजअखेर कोरोनामुक्त ठेवण्यात यश आले आहे.

ग्रामस्थांनी सतर्क रहावे
सहायक पोलिस निरीक्षक अर्जुन घोडे पाटील म्हणाले की, लॉकडाउन शिथिल झाल्यामुळे मुंबई, पुणे भागांतील नागरिक मोठ्या प्रमाणात येत आहेत. काही व्यक्ती प्रशासनाला माहिती न देता, होमक्वारंनटाइन न राहता फिरत आहेत. अशा व्यक्तींपासून संसर्ग वाढण्याचा धोका जास्त आहे. त्यामुळे ग्रामस्थांनी सतर्क राहून अशा व्यक्तींची माहिती पोलिसांना द्यावी.