पुणेकरांनो, आता काळजी घ्या! कोरोना रुग्णांचा नवा उच्चांक

पुणे : पुणे शहरातील एकाच दिवसांत २ हजार ५८७ नवीन कोरोना रुग्ण सापडण्याचा उच्चांक बुधवारी (ता.१७) नोंदला गेला आहे. शहरात गेल्या वर्षभरात आज पहिल्यांदाच एवढ्या मोठ्या संख्येने एका दिवसातील नवे रुग्ण नोंदले गेले आहेत. याआधीचा उच्चांकी आकडा हा २ हजार १२० रुग्णांचा होता. आजच्या या नवीन उच्चांकांने याआधीचा उच्चांक मोडला गेला आहे.याआधी पुणे शहरात १५ सप्टेंबर २०२० ला दिवसात २ हजार १२० नवीन रुग्ण सापडण्याचा उच्चांक नोंदला गेला होता. जिल्हा आरोग्य विभागाच्यावतीने रोज प्रसिद्ध करण्यात येत असलेल्या कोरोना रुग्णांच्या अहवालातून ही बाब स्पष्ट झाली आहे.

दरम्यान, आज दिवसभरात जिल्ह्यात ४ हजार ७४५ नवे कोरोना रुग्ण सापडले आहेत. यामध्ये पुणे शहरातील सर्वाधिक रुग्णांबरोबरच पिंपरी चिंचवडमधील १ हजार २४८, जिल्हा परिषद कार्यक्षेत्रातील ६४१, नगरपालिका हद्दीतील २१७ आणि कॅंटोन्मेंट बोर्ड क्षेत्रातील ५२ नवीन रुग्णांचा समावेश आहे. याशिवाय दिवसभरात १ हजार ९७३ जण कोरोनामुक्त झाले असून अन्य १५ रुग्णांचा मृत्यू झाला आहे.

- पुण्याच्या बातम्या वाचण्यासाठी येथे ► क्लिक करा

- ताज्या बातम्यांसाठी डाऊनलोड करा ई-सकाळचे ऍप

मृत्यू झालेल्यांमध्ये पुणे शहरातील ११ रुग्ण आहेत. पिंपरी चिंचवडमधील तीन आणि नगरपालिका हद्दीतील एका रुग्णाचा मृत्यू झाला आहे. आज जिल्हा परिषद आणि कॅंटोन्मेंट बोर्ड क्षेत्रातील एकाही रुग्णाचा मृत्यू झाला नाही.