बापरे, बारामतीत कोरोना विषाणूचा संसर्ग वाढतोच आहे...

बारामती : शहरातील कोरोना रुग्णांच्या संख्या कमी होत नसल्याने आता सर्वांचीच झोप उडाली आहे. काल बारामतीत तपासलेल्या 649 रुग्णांपैकी तब्बल 197 जण पॉझिटीव्ह सापडल्याने आज पुन्हा एकदा चिंतेचे वातावरण तयार झाले आहे. बारामतीतील रुग्णसंख्येने आता तब्बल दोनशेचाच टप्पा गाठल्याने आता काय करायचे याचा प्रश्न प्रशासनापुढे पडला आहे.

हे वाचा - पुण्यात लॉकडाउन नाहीच; निर्बंध आणखी कडक होणार!

लॉकडाऊनला सर्वांचाच तीव्र विरोध असल्याने लॉकडाऊनकडे प्रशासनही तितक्या गांभीर्याने पाहत नाही, निर्बंध अधिक कडक करावेत की काय या दृष्टीने चर्चा सुरु आहे. नागरिकांनीच काळजी घेऊन कोरोनाग्रस्त होणार नाही या दृष्टीने प्रबोधन करण्याचा प्रयत्न या पुढील काळात होणार आहे. 

दुसरीकडे जिल्ह्यात सर्वाधिक तपासण्या बारामतीत होत असल्याने रुग्णांचा आकडाही मोठा दिसत आहे. इतर तालुक्यात तुलनेने कमी तपासण्या होत असल्याने रुग्णसंख्येचा आकडाही कमी येत आहे. 

दरम्यान शासकीय महिला रुग्णालयाशेजारी असलेल्या नर्सिंग वसतिगृहात ऑक्सिजनची सुविधा असलेले 70 बेडस तयार करण्याचे काम सुरु झाले असून येत्या काही दिवसात हे काम वेगाने पूर्ण करण्याचा प्रयत्न सुरु असल्याचे उपविभागीय अधिकारी दादासाहेब कांबळे व ज्येष्ठ नगरसेवक किरण गुजर यांनी सांगितले.

गर्दीची ठिकाणे शोधून तेथील गर्दी कमी करण्याच्या दृष्टीने प्रशासनाचे प्रयत्न सुरु झाले आहेत. बारामती नगरपालिकेतही आता अनावश्यक व्यक्तींना प्रवेश दिला जाणार नाही. शासकीय स्तरावरही तातडीच्या कामांसाठीच लोकांनी यावे असे आवाहन करण्यात आले आहे. 

पुण्यातील इतर बातम्या वाचण्यासाठी क्लिक करा

बारामतीची आजची (ता. 2) स्थिती...
•    कालचे (ता. 1) एकूण तपासलेले नमुने  649  
•    एकूण बारामतीमधील पॉझिटिव्ह-197
•    शहर-117 ग्रामीण- 77.             
•    एकूण रूग्णसंख्या-9753 
•    बरे झालेले रुग्ण- 8142 
•    एकूण मृत्यू-- 165.

(संपादन : सागर डी. शेलार)