‘नगरसेवकांना सरसकट पेट्रोल मिळणार नाही’

पुणे - 'लॉकडाऊन' असूनही नगरसेवक आणि त्यांचे कार्यकर्ते लोकांच्या मदतीसाठी गल्लीबोळात वाहनांवरून फिरत असल्याची बाब पुणे पोलिसांनी गांभीर्याने घेतली आहे. गर्दी होत असल्याने नगरसेवकांना इंधन न देण्याची भूमिका पोलिसांनी घेतली आहे. परंतु, कामाचे स्वरूप आणि त्याचा परिणाम स्पष्टपणे सांगितल्यास नगरसेवकांना पेट्रोल मिळेल, असे महापालिकेचे आयुक्त शेखर गायकवाड यांनी रविवारी स्पष्ट केले.

बातम्या ऐकण्यासाठी डाऊनलोड करा ई-सकाळचे ऍप

नगरसेवकांना पेट्रोल पंपांवर प्रवेश देऊन,  त्यांना पेट्रोल देण्याबाबत पोलिस आयुक्त के. व्यंकटेशम यांच्याशी चर्चा झाली आहे. सरसकट नगरसेवकांना पेट्रोल देणे शक्य नसल्याचे पोलिसांनी सांगितले आहे. पण, कामानुसार ते दिलेही जात आहे. 

पुढच्या काळात गरज लक्षात घेऊन नगरसेवकांना पास पुरविण्याचा विचार होऊ शकतो. त्याबाबत पोलिसांशी पुन्हा चर्चा केली जाईल,  असे गायकवाड यांनी स्पष्ट केले. खराडीतील राष्ट्रवादी काँग्रेसचे नगरसेवक भैय्यासाहेब जाधव यांना रविवारी पेट्रोल पंपावर जाण्यापासून रोखले. तसेच पेट्रोल देण्यासही पोलिसांनी नकार दिला. या पार्श्वभूमीवर नगरसेवक आपापल्या प्रभागांतील लोकांना काही प्रमाणात अत्यावश्यक सेवा पुरवित आहेत.