शादी डॉट कॉमवरुन मुलींची केली फसवणूक; तोतया सरकारी नोकरदाराला अटक

बारामती : सरकारी नोकरी (Government Servant) आहे व अविवाहीत (Unmarried) असल्याची बतावणी करून शादी डॉट कॉम (Shaadi.com) वरील अनेक मुलींना भुरळ पाडून लग्नाचे आमिष दाखवून शारिरीक संबंध प्रस्थापित करत फसवणूक करणा-या एकास बारामती तालुका पोलिसांनी भोर येथून अटक (Arrest) केली.

पोलिसांनी दिलेल्या माहिती नुसार अजयकुमार नंदकुमार चटौला (रा.रुई रुग्णालय शासकिय वसाहत बारामती) असे अटक करण्यात आलेल्या तरुणाचे आहे. याबाबत मुंबई येथील एका 39 वर्षीय महिलेने लग्न संकेत स्थळावरून आरोपी अजयकुमार चटौला याने लग्नाचे आमिष दाखवत आपली पैशाची फसवणूक करून 21 डिसेंबर 2021 रोजी बलात्कार व फसवणूक केल्या प्रकरणी गुन्हा दाखल केला होता. त्यानुसार त्याला गुरुवारी (ता. 6) अटक केली. त्याला न्यायालयाने 11 जानेवारी पर्यंत पोलिस कोठडी सुनावली आहे.

आरोपी अजयकुमार चटौला हा बारामती येथील रुई शासकीय रुग्णालयात स्विपर म्हणून कार्यरत आहे. तो विवाहित असून देखील शादी डॉट कॉमवर मुलींना रिक्वेस्ट टाकून सरकारी नोकरदार असल्याचे सांगून त्यांच्याशी मैत्री करून लग्नाचे आमिष देत आपल्या जाळ्यात ओढून जवळीक साधायचा. त्यानंतर मुलींच्या घरच्यांना भेटून विश्वास संपादन करून मुलीला सोबत घेऊन फिरायला घेऊन जात होता. त्यानंतर मुलीशी शारीरिक सबंध प्रस्थापित करून पैशांची गरज असल्याचे सांगून पैसे लुबाड्त असल्याचा प्रकार बारामती तालुका पोलिसांनी तपासात समोर आणला आहे.

मुंबईच्या महिलेच्या फसवणुकी नंतर चटौला हा पुण्यातील दुसऱ्या मुलीसोबत भोर येथील एका रूमवर रहात असल्याची माहिती सहायक पोलिस निरीक्षक योगेश लंगुटे यांना मिळाली होती. त्यानुसार पोलिस निरिक्षक महेश ढवाण यांच्या मार्गदर्शनाखाली सहायक पोलिस निरीक्षक योगेश लंगुटे,पोलिस कॉन्स्टेबल मंगेश कांबळे,दत्तात्रय मदने,चालक तुषार लोंढे यांनी सापळा रचत त्याला ताब्यात घेतले.