लोणी काळभोर : नियतीने एकाचवेळी दोघींना घेतले हिरावून

लोणी काळभोर : पुणे सोलापूर महामार्गावरील कदमवाकवस्ती (ता. हवेली ) ग्रामपंचायत हद्दीतील लोणी स्टेशन चौकात कंटेनरने दुचाकीला पाठीमागून दिलेल्या धडकेत सख्या बहिणींचा मृत्यू झाला आहे. हा अपघात शनिवारी (ता. २०) सकाळी साडेसात वाजण्याच्या सुमारास झाला आहे. अपघात एवढा भीषण होता कि, यामध्ये दोन्ही बहिणींचा जागेवरच चेंदामेंदा झाला. व जागेवरच मृत्यू झाला. गायत्री नंदकुमार शितोळे (वय-१७) व राजश्री नंदकुमार शितोळे (वय-१०, रा. कवडीपाट, कदमवाकवस्ती, ता. हवेली) असे अपघातात मृत्यू झालेल्या दुर्दैवी बहिणींची नावे आहेत.

पोलीस सूत्रांनी दिलेल्या माहितीनुसार, गायत्री व राजश्री या कदमवाकवस्ती ग्रामपंचायत हद्दीतील कवडीपाट परिसरात राहत होत्या. दोघीही लोणी काळभोर (ता. हवेली) येथील कन्या प्रशाला विद्यालयात शिक्षण घेत होत्या. शनिवारी सकाळी सात वाजण्याच्या सुमारास मामा पांडुरंग नवनाथ भिक्षे हे दुचाकीवरून गायत्री व राजश्रीला शाळेत सोडायला निघाले होते. शाळेत जात असताना लोणी स्टेशन चौकात सोलापूरच्या दिशेने निघालेल्या कंटेनरने मामा चालवीत असलेल्या दुचाकीला जोरदार धडक दिली. या धडकेत मामा हे रस्त्याच्या बाजूला उडून पडले. तर गायत्री व राजश्री या रस्त्याच्या मधोमध पडल्याने कंटेनर त्यांच्या अंगावरून गेला. व त्यातच त्यांचा मृत्यू झाला. दोन मुलींचा मृत्यूस कारणीभूत ठरलेला कंटेनर लोणी काळभोर पोलिसांनी ताब्यात घेतला आहे. सदर कंटेनर चालक पळून गेला असून लोणी काळभोर पोलीस पुढील तपास करीत आहेत.

दरम्यान, महामार्गाशेजारीच हाकेच्या अंतरावर नामंकित हॉस्पिटल व लोणी काळभोर पोलीस ठाणे आहे. तरीही ना वाहतूक शाखेचे पोलीस, ना शेजारी असलेले डॉक्टर, व ॲम्बुलन्स आली नसल्याने तब्बल अर्धा ते पाऊन तास या मुलींना मदत मिळाली नाही. त्यामुळे अपघात झालेल्या ठिकाणी दोन्ही मुली तशाच पडून होत्या. त्यामुळे मदत मिळाली नसल्याने स्थानिक नागरिकांनी नाराजी व्यक्त केली आहे. या घटनेमुळे लोणी काळभोर व कदमवाकवस्ती परिसरात हळहळ व्यक्त होत आहे.