पुणेकर काही सुधरेनात; अनलाॅकच्या पहिल्याच दिवशी झाली वाहतूक कोंडी

पुणे : अनलॉक-2 च्या पहिल्या दिवशी शुक्रवारी (ता. 24) शहरातील कामासाठी बाहेर पडणाऱ्यांची गर्दी झाली. परंतु, जागोजागी उभारलेले अडथळे पोलिसांकडून न काढले गेल्यामुळे शहरात बहुतांश ठिकाणी वाहतुकीची कोंडी झाली होती. काही भागात अखेर नागरिकांनीच हे अडथळे हटविले. तेव्हा कुठे ही कोंडी फुटली. तुळशीबागेसह अनेक ठिकाणी खरेदीसाठी गर्दी झाली होती. 

ताज्या बातम्यांसाठी डाऊनलोड करा ई-सकाळचे ऍप 

कोरोनाचा प्रादुर्भाव रोखण्यासाठी पुणे महापालिकेकडून दहा दिवसांचा विशेष लॉकडाउन लागू करण्यात आला होता. गुरुवारी रात्री बारा वाजता हा लॉकडाउन मागे घेण्यात आला. त्याचबरोबरच काही अटींवर महापालिकेकडून दुकाने, कार्यालय सुरू करण्यास परवानगी देण्यात आली. त्याचा आज पहिल्याच दिवशी शहरात पुणेकरांना वाहतूक कोंडीचा सामना करावा लागला. सकाळपासूनच रस्त्यावर वाहनांची गर्दी वाढली होती. पी 1, पी 2 पद्धतीने दुकाने उघडण्यास परवानगी दिली असली, तरी अनेक भागात व्यापाऱ्यांकडून दुकाने उघडी करण्यासाठीची लगबग सुरू झाली होती. परंतु, शहरात जागोजागी उभारलेले अडथळे कायम असल्यामुळे गल्लीबोळातही वाहतुकीची कोंडी झाल्याचे पाहावयास मिळाले. 

पुण्याच्या बातम्या वाचण्यासाठी येथे क्लिक करा

टिळक रस्त्यावर पूरम चौकातील झालेली कोंडी पाहून ती फोडण्यासाठी अखेर पोलिसांनी स्वत:हून अडथळे दूर केले. हीच परिस्थिती सातारा, सिहंगड रस्त्यावर देखील होती. शिवाजी रस्ता, बाजीराव रस्ता, लक्ष्मी रस्ता, केळकर, कुमठेकर रस्त्यासह शहराच्या मध्यवर्ती पेठांतील बहुतांश दुकाने आज सुरू झाली. तुळशीबागही पी 1, पी 2 पद्धतीने आजपासून सुरू झाली. मात्र, पहिल्या दिवशी तुळशीबागेतही खरेदीसाठी गर्दी झाली होती. उपनगरातदेखील हीच परिस्थिती पाहावयास मिळाली. त्यात सकाळपासून पाऊस झाल्याने वाहतुकीच्या कोंडीत आखणी भर पडल्याचे चित्र शहरात जागोजागी पाहावयास मिळाले.