जुन्नर (पुणे) : जुन्नर तालुक्यातील ऐतिहासिक दाऱ्या व नाणेघाट येथे पर्यटनास बंदी असतानादेखील गेल्या पंधरा दिवसांपासून पर्यटक गर्दी करत असल्याची येथील नागरिकांची तक्रार आहे.
जुन्नर तालुक्यात कोरोनाचा प्रादुर्भाव वाढत असताना येणाऱ्या पर्यटकांमुळे आदिवासी भागातील गावातही कोरोनाचा शिरकाव होण्याची भीती ग्रामस्थांकडून व्यक्त होत आहे. त्यामुळे आंबोली व घाटघर येथे पर्यटकांना जेवण व खाद्यपदार्थ पुरविणाऱ्या हॉटेल व्यावसायिकांना येथील ग्रामस्थांनी पर्यटकांना थारा देऊ नये, असे कळविले आहे. पावसाळ्यात पुणे जिल्ह्यातील जुन्नर, आंबेगाव, खेड व शिरूर या चार तालुक्यातील वनक्षेत्रातील पर्यटनस्थळे पर्यटकांसाठी बंद राहणार आहेत. कोविड 19 चा प्रादुर्भाव लक्षात घेऊन या संसर्गजन्य आजाराचा प्रसार रोखण्यासाठी हा निर्णय घेण्यात आला.
याबाबत जुन्नर वनविभागाचे उपवन संरक्षक जयरामे गौडा यांनी सर्व वनपरिक्षेत्र अधिकाऱ्यांना या आदेशाचे पालन करण्यासंबंधी कळविले होते. या पावसाळ्यात नाणेघाट, घाटघर, माळशेज घाट, अवसरी घाट उद्यान, किल्ले शिवनेरी, चावंड, हडसर, जीवधन, नारायणगड, ढाकोबा, दुर्गवाडी, भीमाशंकर, आंबोली, खिरेश्वर, कुंडेश्वर महादेव आदी सर्व पर्यटनस्थळावर सुरक्षिततेच्या दृष्टिकोनातून पर्यटकांना बंदी घालण्यात आली. मात्र, तरी देखील जुन्नर तालुक्यातील नाणेघाट, दाऱ्याघाट, आंबोली, दुर्गवाडी, ढाकोबा,खिरेश्वर आदी भागात पर्यटकांचा वावर वाढला आहे.
पर्यटनस्थळी कोरोनाबाधित व्यक्ती आल्यास तिच्या संपर्कातून अन्य पर्यटकांना त्रास होऊ नये, यासाठी ही बंदी घालण्यात आली. या बंदीचे उल्लंघन करणाऱ्या व्यक्ती, संस्था, समूह यावर कायदेशीर कारवाई करण्यात येणार असल्याचे आदेशात नमूद करण्यात आले होते. पर्यटनासाठी आल्यानंतर मद्यपान करून हुल्लडबाजी केल्याने कायदा व सुव्यवस्थेचा प्रश्न निर्माण होतो. तसेच, गडावरून पाय घसरून पडल्याने मृत्यू होण्याच्या घटना घडल्या आहेत. त्यामुळे या आदेशाचे गावाच्या वनहक्क समितीच्या सहकार्याने वन कर्मचाऱ्यांनी पर्यटनस्थळी पर्यटकांचा प्रवेश दिला जाणार नाही, याची दक्षता घेण्यास सांगण्यात आले होते.
पोलिसांचे दुर्लक्ष
सुरवातीच्या काळात या बंदीची चांगली अंमलबजावणी झाली. आंबोली व घाटघर येथील वनहक्क समिती व ग्रामस्थ यांनी ठोस पावले उचलली. याबाबत पोलिसांनादेखील ग्रामपंचायतीमार्फत कळविण्यात आले होते. लॉकडाउन सैल होताच पर्यटकांची पावले दाऱ्या व नाणेघाटाकडे वळू लागली. ग्रामस्थ, वनहक्क समितीचे सदस्य व पर्यटक यांच्यात बाचाबाची, भांडणे, वादविवाद होऊ लागले. याबाबत पोलिसांना कळविले, मात्र त्याकडे पोलिसांनी दुर्लक्ष केले. सुरवातीला पोलिसांची गस्त होत असल्याने एक वचक राहिला होता. पोलिसांकडून आता दुर्लक्ष केले जात आहे. त्यामुळे बंदीकडे ग्रामस्थांनी पाठ फिरवली. मात्र, सर्व ग्रामस्थांना पर्यटकांना सहकार्य करू नये, असे बजावण्यात आले असल्याचे सांगण्यात आले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.