दापोडी-पिंपरी मार्गावर कोंडी नित्याचीच

पिंपरी - जुन्या पुणे-मुंबई महामार्गावर रस्त्याच्या दोन्ही बाजूला होणाऱ्या वाहनांच्या पार्किंगमुळे कोंडी नित्याची झाली आहे. महामार्गावर दापोडी ते पिंपरी दरम्यानच्या रस्त्यावर मेट्रोचे काम सुरू आहे. त्यामुळे ग्रेडसेपरेटरमधील रस्ता वाहतुकीसाठी बंद असतो. वाहनचालकांना सेवारस्त्याचा वापर करावा लागतो. सेवारस्त्यावर वाहने उभी करण्याचे प्रमाण वाढल्यामुळे कोंडीत भर पडते.

दापोडीतील सीएमई चौकामध्ये पिंपरीकडे जाणाऱ्या रस्त्याच्या बाजूला दुचाकी वाहने उभी केलेली असतात. त्यामुळे या रस्त्यावर वाहनांना अडकून पडावे लागते. फुगेवाडी चौकातही अशीच परिस्थिती आहे. नो पार्किंगचे फलक लावलेले असतानाही वाहने उभी असतात. या परिसरातील हॉटेलमध्ये येणारे नागरिक रस्त्यावर डबल पार्किंग करतात. कासारवाडी परिसरात रस्त्याच्या दोन्ही बाजूला मोठ्या प्रमाणात वाहने उभी असतात. पिंपरीमधील डॉ. बाबासाहेब आंबेडकर चौकात रिक्षाचालकांच्या थांब्यामुळे कोंडीचा प्रश्‍न गंभीर झाला आहे.

मेट्रोचे काम संपण्यास अजून दोन वर्षांचा अवधी लागणार आहे. त्यामुळे सेवारस्त्यावर नो पार्किंगमध्ये उभ्या राहणाऱ्या वाहनांवर कडक कारवाई होण्याची आवश्‍यकता आहे. 
- विक्रांत चौधरी, नागरिक

दापोडी ते पिंपरीदरम्यान सेवारस्त्यावर असणारे पीएमपीचे बसथांबे मेट्रोचे काम पूर्ण होईपर्यंत अन्यत्र हलविण्याची आवश्‍यकता आहे. कासारवाडी चौकात होणारी वाहतूक कोंडी सोडवावी.
- राजेंद्र शिंदे, आकुर्डी