Daund Crime : गोहत्या करणाऱ्या टोळीवर तडीपारीची कारवाई

दौंड - दौंड शहर व परिसरात गोहत्या करून गोमांसाची वाहतूक व विक्री करणाऱ्या टोळीतील सात सदस्यांवर तडीपारीची कारवाई करण्यात आली आहे. पुणे ग्रामीण पोलिस दलाचे अधीक्षक अंकित गोयल यांनी ही कारवाई केली आहे.

दौंड पोलिस ठाण्याचे निरीक्षक भाऊसाहेब पाटील यांनी या बाबत माहिती दिली. अधीक्षक अंकित गोयल यांनी दौंड पोलिसांनी सादर केलेल्या प्रस्तावानुसार टोळीचा म्होरक्या अश्पाक उर्फ लाला कासम कुरेशी (वय ४२) याच्यासह आसिफ कासम कुरेशी (वय ४१), वाजीद सादिक कुरेशी (वय २८), कय्युम शब्बीर कुरेशी (वय ३५), बाब्या उर्फ इमरान इब्राहिम कुरेशी (वय ३५), इद्रिस आबिद कुरेशी (वय ४०) व तन्वीर ईस्माईल कुरेशी (वय २३, सर्व रा. कुरेशी मोहल्ला, खाटीक गल्ली, दौंड) यांना ६ मे २०२३ पासून एका वर्षाकरिता तडीपार केले आहे.

पुणे शहर पोलिस आयुक्तालय, पिंपरी चिंचवड पोलिस आयुक्तालय, पुणे ग्रामीण पोलिस हद्दीसह नगर जिल्ह्यातील श्रीगोंदा व कर्जत तालुका हद्दीतून टोळीला तडीपार करण्यात आले आहे.

टोळीकडून गोहत्या, गोवंश हत्या करून मांसाची वाहतूक आणि विक्री सातत्याने केली जात होती. पोलिसांना संशय येऊ नये, याकरिता टोळीकडून गोमांस वाहतुकीसाठी स्पोर्ट्स युटिलिटी व्हेईकल (एसयूव्ही) वाहनांचा वापर केला जात होता.

अपर पोलिस अधीक्षक आनंद भोईटे, उप अधीक्षक राहुल धस यांच्या मार्गदर्शनाखाली निरीक्षक भाऊसाहेब पाटील, स्थानिक गुन्हा अन्वेषण शाखेचे निरीक्षक अविनाश शिळीमकर, उप निरीक्षक सतिश राऊत, हवालदार महेश बनकर, पोलिस नाईक शरद वारे, कॉन्स्टेबल सागर गलांडे व योगेश गोलांडे यांनी ही कारवाई केली आहे.