Pune : बाधित क्षेत्रातील नागरिकांनी काळजी घ्यावी

पुणे : शहरासह संपूर्ण जिल्ह्यातच सामान्यतः ढगाळ हवामान आणि विजांच्या गडगडाटासह पावसाच्या एक-दोन मध्यम सरी कोसळण्याची शक्यता आहे. घाटमाथ्यावर मुसळधार ते तुरळक ठिकाणी जोरदार पाऊस पडण्याचा अंदाज हवामान खात्याने वर्तवली आहे. या काळात बाधित क्षेत्रातील नागरिकांनी विशेष काळजी घ्यावी, असे आवाहन विभागाने केले आहे.

बंगालच्या उपसागरात तीव्र झालेल्या चक्रीवादळ आणि अरबी समुद्रातील चक्राकार वाऱ्यांच्या स्थितीमुळे राज्यभर मॉन्सून सक्रिय झाला आहे. पुण्यातही मुसळधार पावसाचा ऑरेंज अलर्ट देण्यात आला आहे. त्या पार्श्वभूमीवर पुण्यातील वेधशाळेने विशेष सूचनापत्र काढले आहे. मंगळवारी (ता.३) तीव्र पावसामुळे दृष्यमानता घटणे, रस्त्यांना मोठ्या प्रमाणावर खड्डे पडून वाहतुकीत अडथळा निर्माण होणे, नदीकाठी किंवा शहरातील सखल भागात पाणी तुंबण्याची शक्यताही वर्तविण्यात आली आहे. नेहमी बाधित होणाऱ्या भागातील नागरिकांनी विशेष काळजी घेण्याबरोबरच घाट माथ्यावर पर्यटनासाठी जाणे टाळावे, असा इशाराही देण्यात आला आहे.

एका तासाला १०० मिलीमीटर पेक्षा जास्त पाऊस पडला तर ढगफुटी म्हटले जाते. रविवारी पुण्यात तसा पाऊस पडला नाही. त्यामुळे ही ढगफुटी नाही. निश्चितच कमी वेळेत जास्त पाऊस पडला होता. त्यामुळे निश्चितच सखल भागात पाणी साचले. जिल्ह्यातही अनेक ठिकाणी पाच तासात ७० ते ८० मिलीमीटर पावसाच्या नोंदी झाल्या आहे. दुपारनंतर पाऊस सुरू झाला तर तो रात्री पर्यंत चालू राहील. पुणे, मुंबई आणि पश्चिम महाराष्ट्रात पुढील दोन दिवस मुसळधार पावसाची स्थिती कायम राहील. विशेषतः घाट माथ्यावर अति जोरदार पावसाची शक्यता आहे.

- डॉ. के.एस. होसाळीकर, प्रमुख, हवामानशास्त्र विभाग, पुणे

पावसासाठी शब्दावली (तासाभरात पडणारा पाऊस, मिलीमीटरमध्ये) ः

१) हलक्या सरी ः १०

२) मध्यम सरी ः १० ते २०

३) तीव्र सरी ः २० ते ३०

४) जास्त तीव्र सरी ः ३० ते ५०

५) अतितीव्र सरी ः ५० ते १००

६) ढग फुटले ः १०० पेक्षा जास्त