Pune Budget : महापालिकेचा अर्थसंकल्प सादर होऊनही अर्थसंकल्प महापालिकेच्या संकेतस्थळावर नाही

पुणे - देशातील पहिली "स्मार्ट सिटी' म्हणविणाऱ्या पुणे महापालिकेचा अर्थसंकल्प सादर होऊन चार दिवस उलटले, मात्र अजूनही अर्थसंकल्प महापालिकेच्या संकेतस्थळावर उपलब्ध नाही. अशा प्रकारे नागरीकांपासूनच अर्थसंकल्प दडवून ठेवण्याचे कारण काय ? अशी टिका सजग नागरीक मंचाचे अध्यक्ष विवेक वेलणकर यांनी केली आहे.

पुणे महापालिकेचे आयुक्त विक्रमकुमार यांनी शुक्रवारी महापालिकेचा अर्थसंकल्प सादर केला. सुमारे साडे नऊ हजार कोटी रुपयांचा अर्थसंकल्प सादर करताना कुमार यांनी वाहतुक कोंडी, रस्ते, पाणी पुरवठा व सध्या सुरु असलेल्या प्रकल्पांना गती देण्याचा विचार व्यक्त केला होता. दरम्यान, अर्थसंकल्प सादर झाल्यानंतर मोठ्या प्रमाणात उत्सुकता असलेल्या अभ्यासक, तज्ज्ञ व सर्वसामान्य नागरीकांकडून मागील चार दिवसांपासून महापालिकेच्या संकेतस्थळावर अर्थसंकल्पाची माहिती घेतली जात आहे. मात्र अजूनही महापालिकेच्या संकेतस्थळावर अर्थसंकल्प देण्यात आला नाही.

याविषयी वेलणकर म्हणाले, 'पुणे महापालिका देशातील पहिली स्मार्ट सिटी आहे. मात्र या महापालिकेला आपला अर्थसंकल्प सादर होऊन चार दिवस झाल्यानंतरही तो संकेतस्थळावर अद्ययावत करण्याची गरज वाटत नाही, हे संतापजनक आहे. नागरीकांच्या करांच्या पैशाचे नियोजन बजेटमधून होत असते. मात्र तोच अर्थसंकल्प नागरीकांपासून दडवून ठेवण्याचे कारण काय ? याचे गौडबंगाल अद्याप उलगडत नाही. महापालिकेने त्वरीत अर्थसंकल्प संकेतस्थळावर प्रसिद्ध करावा.