#HealthIssue थंडीमुळे बालकांना अतिसार 

पुणे - तुमच्या मुलाला अतिसार होतोय? तर, घाबरू नका. संयम ठेवा. यंदा पुण्यात थंडीचा मुक्काम वाढल्याचा हा लहान मुलांच्या आरोग्यावर झालेला थेट परिणाम सध्या दिसत आहे. अचूक निदान, योग्य औषधोपचार आणि स्वच्छता या त्रिसूत्रीने हिवाळ्यातील अतिसार निश्‍चित बरा होतो, असा विश्‍वास वेगवेगळ्या बालरोगतज्ज्ञांनी व्यक्त केला आहे. 

आपल्या घरातील बाळाला अतिसार होत असल्याने शहरातील पालक काळजीत पडले असल्याचे चित्र दिसून येत आहे. घरात दुडुदुडु करत खेळणारे, घरभर फिरणारे मूल शांत बसू लागले आहे. त्याचा आहार कमी झाला आहे. त्यामुळे त्याचे कमी झालेले वजन, या सर्वांमुळे लहान मुलांच्या पालकांची काळजी सध्या वाढलेली दिसते. शहरातील थंडी जानेवारीच्या शेवटपर्यंत कायम असल्याने बहुसंख्य लहान मुलांना हिवाळ्यातील अतिसार होत असल्याचे निरीक्षण डॉक्‍टरांनी नोंदविले आहे. 

याबाबत बोलताना बालरोगतज्ज्ञ संघटनेचे माजी राष्ट्रीय अध्यक्ष डॉ. प्रमोद जोग म्हणाले, ‘‘दर वर्षी हिवाळ्यात काही लहान मुलांना अतिसाराचा त्रास होतो. रोटा प्रकारातील विषाणूंचा संसर्ग वाढल्याने हिवाळ्यात लहान मुलांना हा त्रास होतो. यंदा अद्यापही थंडी टिकून आहे. त्यामुळे अतिसाराच्या रुग्णांची संख्या वाढत आहे. यात शरीराचे तापमान कमी होणे, जलक्षय आणि रक्तातील साखरेचे प्रमाण कमी होणे, असा त्रास बाळाला होतो. त्याच वेळी जंतूसंसर्ग होऊ नये म्हणून बाळाला स्वच्छ ठेवणे आवश्‍यक आहे.’’

हा त्रास सुदृढपेक्षा कुपोषित बालकांना जास्त होतो. त्यांचे वजन कमी असते. ते अशक्त असते. आहार कमी असतो, असेही त्यांनी स्पष्ट केले. 

बालरोगतज्ज्ञ डॉ. सुनील गोडबोले म्हणाले, ‘‘लहान मुलांमध्ये हिवाळ्यातील अतिसाराचे प्रमाण आढळून येत आहे. पण, आठवड्याभरात हा आजार योग्य औषधोपचार आणि काळजी घेतल्याने बरा होतो. औषधांबरोबरच बाळाला जलक्षय होणार नाही, याची प्रकर्षाने काळजी पालकांनी घेतली पाहिजे. त्यासाठी मीठ, साखर आणि पाण्याचे मिश्रण द्यावे.’’