वाहतूक बंदमध्ये पीएमपी बस नको

पुणे - शिवाजी रस्त्यावरील वाहतूक बंद करताना पीएमपी बसचा त्यात समावेश करू नये, अशी मागणी ‘पादचारी प्रथम’ संस्थेने पोलिस आयुक्त डॉ. के. वेंकटेशम यांच्याकडे निवेदनाद्वारे केली. शहरातील प्रमुख वर्दळीच्या रस्त्यांवर पीएमपीला प्राधान्य द्या; अन्यथा लाखो प्रवाशांचे हाल होतील, असेही त्यात म्हटले आहे.

ताज्या बातम्यांसाठी डाऊनलोड करा ई-सकाळचे ऍप

नववर्ष, गणेश जयंती, चतुर्थी आदी दिवशी वाहतूक पोलिस शिवाजी रस्त्यावरील वाहतूक बंद करतात. त्याचा फटका सुमारे दोन ते अडीच लाख पीएमपी प्रवाशांना बसतो. 

या रस्त्यावरील वाहतूक बंद केल्यामुळे बसच्या सुमारे दोन हजार फेऱ्या रद्द होतात. तसेच पीएमपीचे सुमारे ३५ लाख रुपयांचे नुकसान होते, असे दिसून आले आहे. या पार्श्‍वभूमीवर सार्वजनिक वाहतुकीला पोलिसांनी प्राधान्य द्यायला हवे. वाहतुकीवर निर्बंध आणताना प्रथम दुचाकी, चारचाकी वाहनांवर आणावेत. बसची वाहतूक बंद करणे हा शेवटचा पर्याय असावा. वाहतुकीला बंद करण्याची पूर्वसूचना किमान दोन दिवस आधी देण्याची मागणी ‘पादचारी प्रथम’चे प्रशांत इनामदार यांनी केली आहे.