Dr. Nanasaheb Parulekar : निसर्गयात्रींचा रोचक प्रवास आज उलगडणार

पुणे : देशातील वन्यजीव संवर्धन, गिर्यारोहण क्षेत्रातील रोमांचकारी घटना आणि निसर्ग व पर्यावरण या क्षेत्रातील अभ्यासातून समोर आलेल्या विविध बाबी निसर्गयात्रींच्या माध्यमातून आज पुणेकरांना अनुभवता येणार आहेत.

‘सकाळ’चे संस्थापक संपादक डॉ. नानासाहेब परुळेकर यांच्या १२६ व्या जयंतीनिमित्त निसर्गयात्रींशी एका अनोख्या संवादाचे आयोजन करण्यात आले आहे. त्यात पक्षीतज्ज्ञ किरण पुरंदरे, निसर्ग अभ्यासक भाऊ काटदरे, गिर्यारोहक उमेश झिरपे आपले अनुभवविश्‍व खुले करणार आहेत.

जल, जंगल आणि गिरीशिखरे या विषयावर बुधवारी (ता.२०) सायंकाळी पाच वाजता बालगंधर्व रंगमंदिर येथे ही मुलाखत रंगणार आहे. निसर्गाच्या सानिध्यातील त्यांचे रोमांचकारी अनुभव आणि निसर्ग संवर्धनाचा अनोखा प्रवास यावेळी उलगडेल.

या कार्यक्रमात स्वातंत्र्यसैनिक आणि पत्रकार (कै.) ना. अ. पेंडसे पुरस्कृत डॉ. नानासाहेब परुळेकर स्मृती पुरस्कारांचे वितरण होईल. नागरिकांनी या कार्यक्रमास मोठ्या संख्येने उपस्थित राहावे, असे आवाहन ‘सकाळ माध्यम समूहा’तर्फे करण्यात आले आहे.

भागवत, गोमासे आणि पाटील यांना डॉ. परुळेकर पुरस्कार

मुंबई विद्यापीठातील उपकुलसचिव भरती प्रक्रियेतील गैरप्रकार समोर आणणारे संजीव भागवत, नागपूर मध्यवर्ती कारागृहातील गांजा आणि मोबाईल रॅकेटचा पर्दाफाश करणारे वरिष्ठ बातमीदार मंगेश गोमासे आणि कोल्हापुरातील राजाराम हायस्कूलच्या स्थलांतराबद्दल सडेतोड भूमिका घेणारे सदानंद पाटील यांना यंदाचा ‘डॉ. नानासाहेब परुळेकर स्मृती पुरस्कार’ जाहीर झाला आहे.

विविध विषयांवर आणि सामाजिक प्रश्‍नांवर सातत्याने लेखन करणाऱ्या ‘सकाळ समूहा’तील बातमीदारांना दरवर्षी या पुरस्काराने गौरविण्यात येते. स्वातंत्र्यसैनिक व व ज्येष्ठ पत्रकार (कै) ना. अ. पेंडसे यांनी दिलेल्या निधीतून हा पुरस्कार देण्यात येतो.