Dr. Parulekar Award : भागवत, पाटील, गोमासेंना डॉ. परुळेकर पुरस्कार

पुणे : मुंबई विद्यापीठातील उपकुलसचिव भरती प्रक्रियेतील गैरप्रकार समोर आणणारे बातमीदार संजीव भागवत, नागपूर मध्यवर्ती कारागृहातील गांजा आणि मोबाईल रॅकेटचा पर्दाफाश करणारे वरिष्ठ बातमीदार मंगेश गोमासे आणि कोल्हापुरातील राजाराम हायस्कूलच्या स्थलांतराबद्दल सडेतोड भूमिका घेणारे बातमीदार सदानंद पाटील यांना यंदाचा ‘डॉ. नानासाहेब परुळेकर स्मृती पुरस्कार’ जाहीर झाला आहे.

विविध विषयांवर आणि सामाजिक प्रश्‍नांवर सातत्याने लेखन करणाऱ्या ‘सकाळ’मधील बातमीदारांना दरवर्षी या पुरस्काराने गौरविण्यात येते. स्वातंत्र्यसैनिक व ज्येष्ठ पत्रकार (कै) ना. अ. पेंडसे यांनी दिलेल्या निधीतून पुरस्कार देण्यात येतो.

‘सकाळ’चे संस्थापक-संपादक डॉ. नानासाहेब परुळेकर यांच्या १२६व्या जयंतीनिमित्त बुधवारी (ता. २०) सायंकाळी पाच वाजता बालगंधर्व रंगमंदिरात पुरस्कारांचे वितरण होईल. जल, जंगल, गिरीशिखरे या विषयावरील परिसंवादही होणार आहे.

भागवत यांनी ‘डेटा एन्ट्री ऑपरेटरचा थेट कुलसचिव’ हे वृत्त प्रकाशित केले होते. यासंबंधी उच्च व तंत्रशिक्षणमंत्र्यांनी २० डिसेंबर २०२२ रोजी भरती प्रक्रियेच्या चौकशीचे आदेश दिले. माजी कुलगुरू आर. एस. गवळी यांच्या अध्यक्षतेखाली तीन तज्ज्ञांची समिती नेमली आहे.

गोमासे यांच्या वृत्तांकनामुळे नागपूर कारागृहातील गैरप्रकारासंबंधी अधिकाऱ्यांची उचलबांगडी झाली. कारागृहात कैद्यांकडे सातत्याने गांजा, मोबाईल, बॅटरी सापडत असल्याचे गोमासे यांनी उघडकीस आणले. याविषयी वृत्तमालिका प्रकाशित करत त्यांनी प्रशासनाला कारवाई करण्यास भाग पाडले.

पाटील यांच्या वृत्तामुळे ऐतिहासिक राजाराम हायस्कूलचे स्थलांतर थांबले, हायस्कूलचे स्थलांतर करून तेथे भक्तांसाठी सोयीसुविधा निर्माण करण्यासंदर्भात चर्चा केली. अधिकाऱ्यांनी हे स्थलांतर होणार असल्याचे सांगितले. त्यानंतर ‘सकाळ’ म्हणून भूमिका घेत ऐतिहासिक हायस्कूलच्या स्थलांतराचा डाव हाणून पाडला. वृत्तमालिका आणि कोल्हापूरकरांच्या प्रतिसादामुळे पालकमंत्री दीपक केसकर यांनी स्थलांतर होणार नाही, अशी घोषणा केली.