चेंबरमधील दुर्गंधीयुक्त पाण्यामुळे आरोग्याचा प्रश्न ऐरणीवर

कॅन्टोन्मेंट : मिठानगरमध्ये (कोंढवा खुर्द) दाट लोकवस्ती असून, अरुंद रस्ते, ड्रेनेज लाईन, चेंबरची झाकणे तुटणे, दुर्गंधीयुक्त पाणी रस्त्यावर वाहन्याचे प्रकार फक्त पावसाळ्यात नाही, तर वारंवार होत असल्याने स्थानिक नागरिक कमालीचे त्रासले आहेत. पालिका प्रशासनाने तातडीने दखल घेऊन चेंबरची दुरुस्ती करावी, अशी मागणी स्थानिक नागरिकांनी केली आहे. आतापर्यंत नगरसेवक असणाऱ्यांनीच त्यांनीच ड्रेनेज लाईन, रस्ते, चेंबरची कामे केली आहेत. मात्र, नगरसेवकपदाचा कार्यकाल संपताच त्यांना आतापर्यंत मिठानगरमधील नागरिकांच्या आरोग्याचा कळवळा का आला, असा संतप्त सवाल स्थानिक नागरिकांनी उपस्थित केला आहे.

कोंढवा खुर्द- मिठानगरमधील (प्रभाग क्र.२७) समस्या सोडविण्याकडे मनपा प्रशासनाकडून दुर्लक्ष होत असून, नागरिकांच्या आरोग्याचा प्रश्न ऐरणीवर आला आहे. नागरिकांवरील बेगडी प्रेम दाखवत माजी नगरसेवकांनी मोर्चा काढण्याचा इशारा दिल्याची टीका नागरिकांकडून केली जात आहे. दरम्यान, मिठानगर मुख्य रस्त्यावरील चेतना गार्डन सोसायटीसमोरील ड्रेनेजचे झाकण तुटले असून, दुर्गंधीयुक्त सांडपाणी रस्त्यावर वाहत आहे. नगरसेवकांची मुदत संपल्याने सध्या पालिका प्रशासन आहे. प्रशासनाने दोन-तीन दिवसांत दखल घेतली नाही, तर नागरिकांना बरोबर घेऊन पालिकेवर आक्रोश आंदोलन केले जाईल, असा इशारा माजी नगरसेवक गफुर पठाण यांनी दिला आहे.