पुणे - धायरी येथील पुणे महापालिकेच्या सुक्या कचऱ्यावरील प्रक्रिया प्रकल्प शुक्रवारी (ता. १४) पहाटे लागलेल्या आगीत जळून खाक झाला आहे. त्यामुळे आता महापालिकेला ५० टन सुका करता इतर प्रकल्पावर जिरविण्याची वेळ आली आहे.
पुणे शहरात निर्माण होणाऱ्या सुक्या कचऱ्यामध्ये प्रक्रिया न होऊ शकणारा नाकारलेला कचरा असतो. या कचऱ्याची विल्हेवाट लावण्यासाठी महापालिकेने ‘ड्रायवेस्ट’ प्रकल्प ठेकेदाराच्या माध्यमातून धायरी येथे पारी कंपनीजवळ सुरु केलेला आहे.
शहराच्या विविध भागातून हा नाकारलेला सुका कचरा या ठिकाणी पाठवला जातो. तेथे मशिनमध्ये हा कचरा टाकून त्याचे बारीक तुकडे केले जातात. शुक्रवारी पहाटे अडीचच्या सुमारास आग लागली, बघता बघता आगीने रौद्ररूप धारण केल्याने धुराचे लोट आकाशात गेले होते.
अग्निशामक दलाचे स्टेशन ऑफिसर प्रभाकर उंब्रटकर म्हणाले,‘‘आग खूप मोठी होती, आम्हाला पाणी मारालयालाही जागा नव्हती. पाच अग्निशामक दलाच्या गाड्यांनी सुमारे दीड तास पाणी मारून ही आग आटोक्यात आणली. यासाठी टँकरच्या १४ फेऱ्या मारून पाणी आणावे लागले आहे.
कामगारांचे प्राण थोडक्यात वाचले
या कचरा प्रकल्पावर काम करणाऱ्या १२ कामगारा आणि त्यांच्या कुटुंबासाठी त्याच ठिकाणी पत्र्याचे शेड मारून घरे तयार करण्यात आलेली आहेत. या ठिकाणी आग लागलेली असताना सर्व कामगार झोपते होते, त्याच वेळी एका कामगाराला जाग आल्याने आग लागल्याचे लक्षात आले.
त्याने सर्वांना जागे करून प्रकल्पाच्या आवारातून बाहेर काढले. काही वेळातच आगीने सर्व भाग व्यापला. त्यात कामगारांचे सर्व जीवनावश्यक वस्‍तू, कपडे, भांड्यांचे नुकसान झाले आहे. सुदैवाने कामगारांना कोणतीही इजा झाली नाही.
शेजारील केंद्र बंद
पुणे महापालिकेने पारी कंपनीच्या जवळच एक अग्निशामक केंद्र बांधून तयार केले आहे, पण गेल्या तीन चार वर्षापासून हे केंद्र सुरुच होऊ शकलेले नाही. हे केंद्र सुरु झाले असते तर महापालिकेच्या प्रकल्पाचे एवढे मोठे नुकसान झाले नसते, असे शिवसेना उद्धव बाळासाहेब ठाकरे पक्षाचे विभागप्रमुख महेश पोकळे यांनी सांगितले.
‘धायरीतील आगीमध्ये महापालिकेचा सुक्या कचऱ्याचा ५० टन क्षमतेचा प्रकल्प जळून खाक झाला आहे. त्यामुळे या ठिकाणी येणाऱ्या कचरा दुसऱ्या प्रकल्पावर पाठवला जाईल. हा प्रकल्प बंद पडल्याने कचरा संकलन व प्रक्रियेला अडथळा येणार नाही.’
- संदीप कदम, उपायुक्त, घनकचरा व्यवस्थापन विभाग
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.