Baramati News : खंडीत सेवांनी व मुसळधार पावसाने बारामतीकरांची त्रेधातिरपीट

बारामती - खंडीत वीजपुरवठ्याने आज बारामतीत नागरिक हैराण झाले. दैनंदिन देखभाल व दुरुस्तीसाठी महावितरणकडून सकाळी नऊ ते दुपारी दोन पर्यंत शहराच्या मुख्य भागातील वीजपुरवठा खंडीत ठेवण्यात आला होता. खंडीत वीजपुरवठा, इंटरनेटमध्ये येणारा अडथळा, मोबाईल नेटवर्कमधील अडचणी व त्यातच आलेला मुसळधार पाऊस या सर्वांमुळे बारामतीकर हैराण झाले होते.

दुपारी दोन नंतर काही काळासाठी वीजपुरवठा सुरळीत झाला पण त्या नंतर पुन्हा वीजपुरवठा खंडीत झाला. त्यातच मुसळधार पावसाने बारामतीला झोडपून काढल्याने दुपारी चारपर्यंत वीजपुरवठा विस्कळीतच होता.

महावितरणकडून वीजपुरवठा खंडीत करण्याबाबत पूर्वसूचना देण्यात आली असली तरी प्रत्यक्षात दुपारी दोन पर्यंतच वीजपुरवठा खंडीत होण्याची ती सूचना होती. प्रत्यक्षात सात तासांहून अधिक वीजपुरवठा खंडीत राहिल्याने बारामतीचे जनजीवन विस्कळीत झाले होते.

काल काही कंपन्यांची इंटरनेट सेवा विस्कळीत असल्याने तर आज वीजपुरवठा खंडीत झाल्याने कामकाजावर परिणाम झाला. आज दिवसभर अनेक कंपन्यांच्या मोबाईलचे नेटवर्क गायब झाल्याने अनेकांना एकमेकांशी संपर्क साधण्यात अडचणी आल्या.

त्यातच मुसळधार पावसाने आज दुपारी चार नंतर बारामतीच्या जनजीवनावर देखील परिणाम झाला होता. अचानकच पावसाने हजेरी लावल्याने अनेक जण चिंब भिजून गेले होते. कोणतीही पूर्वतयारी न करता घराबाहेर पडलेल्यांना भिजण्याशिवाय पर्यायच राहिला नव्हता. मुसळधार पावसासह वेगाने वाहणारे वारे व ढगांच्या गडगडाटाने पावसाळी वातावरण तयार झाले होते.