पुण्यात रोज एकवेळ पाच तास पाणी

पुणे - पुणेकरांना समान पाणीपुरवठा करण्याचे नियोजन महापालिकेने केले आहे. त्यामुळे सर्व भागांना दररोज एकवेळ सलग पाच तास पाणीपुरवठा करण्यात येईल. याची अंमलबजावणी सोमवार(ता. २९)पासून होईल, असे महापौर मुक्ता टिळक यांनी मंगळवारी जाहीर केले. 

वितरण व्यवस्थेतील दोष दूर करून ज्या भागांत सात तासांपेक्षा अधिक पाणीपुरवठा होता, तो कमी होणार आहे. त्यामुळे ऐन दिवाळीत पुणेकरांना काटकसरीने पाण्याचा वापर करावा लागेल. पावसाने ओढ दिल्याने शहराच्या पाणीसाठ्यात कपात करण्याचा निर्णय कालवा समितीने घेतला आहे. त्यातच बहुतांशी भागात अपुरा आणि कमी दाबाने पाणीपुरवठा होत आहे. त्यामुळे गेल्या १५ दिवसांपासून पुणेकरांचे हाल होत आहेत. पाणीसाठ्यात कपात होणार असल्याने दिवाळीनंतर दररोज दोनऐवजी एकवेळ पाणीपुरवठा करण्याची घोषणा महापालिका प्रशासनाने सोमवारी केली. या पार्श्‍वभूमीवर महापौरांसमवेत झालेल्या गटनेत्यांच्या बैठकीत धोरण आखण्यात आले. टिळक म्हणाल्या, ‘‘पाणी कपातीची वेळ आली तरी पाणी कमी पडू देणार नाही. काही भागात सात-आठ तास पाणीपुरवठा होता. काही भागातील नागरिकांना चार तासही पाणी मिळत नाही. त्यामुळे पुरेशा दाबाने पाणीपुरवठ्याचा निर्णय घेतला आहे.’’

महापालिका आयुक्त सौरभ राव म्हणाले, ‘‘वितरण व्यवस्थेत दोष असल्याने पाण्याची गळती होते. परिणामी नागरिकांना पाणी कमी पडते. त्यामुळे गळती रोखण्याच्या उपाययोजना करून धरणातून घेण्यात येणाऱ्या पाण्याचा पूर्ण वापर करता येणार आहे.’’