पाणीपुरीवाल्याच्या रेफ्रिजरेटरचा स्फोट; दोन युवक गंभीर जखमी 

शिक्रापूर : चौफुला (पिंपळे-जगताप, ता. शिरूर) येथे आज एका रेफ्रीजरेटरचा स्फोट होवून दोन युवक गंभीर जखमी झाले आहेत. फॅशनेबल कपड्यांच्या दुकानाच्या पाठीमागे एका पाणीपुरीच्या खोलीतील रेफ्रीजरेटरचा हा स्फोट जखमी युवकांच्या मागील बाजूने अचानक झाला. पर्यायाने त्यांना दुकानातून बाहेर जाता न आल्याने ते जास्त प्रमाणात भाजले गेले. 

महाराष्ट्रातील बातम्या वाचण्यासाठी येथे ► क्लिक करा

चाकण-शिक्रापूर रस्त्यावरील चौफुल्यावर आज सकाळच्या सुमारास येथील अमित मोहन तिखे (वय २५, रा. वाजेवाडी) हा आपल्या फॅशनेबल कापड दुकानात आपला मित्र शंकर उर्फ बंटी सुरेश साबळे (वय २३, रा.साबळेवाडी, ता. खेड) याचेसमवेत गप्पा मारत असताना दुकानाच्या मागील बाजूला असलेल्या पाणीपुरी गाडी चालक रमेश चंद्र आहेर याच्या खोलीतील रेफ्रीजरेटचा अचानक स्फोट झाला. दरम्यान, हा स्फोट एवढा भयंकर होता की, कापड दुकानातील सर्व वस्तू दुकानाच्या बाहेर फेकल्या गेल्या आणि वरील दोघांनाही बाहेर पडता न आल्याने दोघेही गंभीररित्या भाजले.

पुण्याच्या बातम्या वाचण्यासाठी येथे ► क्लिक करा

दरम्यान, शेजारीच असलेले वाजे वडेवाले दुकानाचे मालक दादा वाजे यांनी आपल्या स्वत:च्या गाडी घालून दोघांनाही शिक्रापूरातील एका खाजगी रुग्णालयात दाखल केले. घटनेची माहिती समजताच शिक्रापूर पोलिस स्टेशनचे साहय्यक पोलिस निरीक्षक मयूर वैरागकर, फौजदार राजेश माळी, हवालदार प्रशांत गायकवाड आदी घटनास्थळी दाखल झाले. या संपूर्ण दुर्घटनेची नोंद शिक्रापूर पोलिस स्टेशनमध्ये करण्यात आली असून, तपासानंतर योग्य ती कायदेशीर कार्यवाही केली जाईल अशी महिती वैरागकर यांनी दिली. 

(संपादन : सागर डी. शेलार)