माथाडी संघटनेच्या नावाखाली दोन लाख 90 हजार रुपयांची खंडणी उकळणारा अटकेत

पुणे - माथाडी संघटनेच्या नावाखाली दोन लाख ९० हजार रुपयांची खंडणी उकळणाऱ्या एकास खंडणी विरोधी पथकाने अटक केली. खडकी रेल्वे स्थानकातील मालधक्का परिसरात ही कारवाई करण्यात आली.

पप्पू भिवा खरात (वय ३६, रा. ओैंध) असे अटक करण्यात आलेल्याचे नाव आहे. याप्रकरणी चाकण येथील एका खासगी कंपनीतील अधिकाऱ्याने फिर्याद दिली. पोलिसांनी दिलेल्या माहितीनुसार, फिर्यादी हे एका खासगी कंपनीत अधिकारी आहेत. त्यांच्या कंपनीसाठी अन्य राज्यांतून रेल्वेने माल पुण्यात येतो. खडकीतील मालधक्का परिसरात रेल्वेने आलेल्या माल उतरल्यानंतर तो कंपनीमार्फत त्यांच्या कंपनीमध्ये पोहोच केला जातो.

दरम्यान, खरात याने माथाडी संघटनेच्या नावाखाली कंपनीतील अधिकाऱ्याला धमकावले. "मालाची वाहतूक आमच्या संघटनेकडून करण्यात येईल, " असे सांगून खरातने त्यांच्याकडून एक लाख ९० हजार रुपये खंडणी उकळली. त्यानंतर खरातने पुन्हा कामात अडथळा आणून एक लाख रुपयांची मागणी केली. पैसे न दिल्यास जातीवाचक शिवीगाळ केल्या प्रकरणी गुन्हा दाखल करण्याची धमकी त्यांना देण्यात आली. खरातला एक लाख रुपये त्यांनी दिली. पैसे दिल्यानंतर खरातकडून धमकी दिल जात होती. याबाबत अधिकाऱ्याने पोलिसांकडे तक्रार दिली होती. त्यानुसार, पोलिसांनी खरातला सापळा लावून अटक केली. त्यानंतर त्याच्या विरुद्ध खडकी पोलिस ठाण्यात गुन्हा दाखल करण्यात आला. या प्रकरणाचा तपास पोलिस उपनिरीक्षक अर्जुन बोमदंडी करत आहेत.