बाप रे, बारा वर्षांच्या मुलीसमोर आला बिबट्या...

महाळुंगे पडवळ (पुणे) : आंबेगाव तालुक्यातील महाळुंगे पडवळ येथील घोडेकरमळा व पाटीलवस्ती येथे दोन ते तीन बिबट्यांनी धुमाकूळ घातला आहे. सान्वी हरिश चासकर (वय १२) या मुलीवर बिबट्याने हल्ला करण्याचा प्रयत्न केला. तसेच, याच परिसरात मेंढीवर हल्ला करुन तिला बिबट्याने ठार केले. पशुधनावर वारंवार हल्ले होत असल्याने शेतकऱ्यांना रात्र जागून काढावी लागत आहे. वनविभागाने त्वरीत पिंजरा लावण्याची व्यवस्था करावी. अन्यथा वनखात्याच्या कार्यालयासमोर जनावरे बांधून आंदोलन केले जाईल, असा इशारा ग्रामस्थांनी दिला आहे.

पुण्याच्या इतर बातम्या वाचण्यासाठी येथे क्लिक करा
     
महाळुंगे पडवळ येथे घोडेकरमळा व पाटीलवस्तीवर गेल्या आठ दिवसांपासून बिबट्याचा नेहमीच वावर आहे. बुधवारी (ता. २) रात्री घोडेकरमळा वस्तीकडे हरिश चासकर, मुलगी सान्वी व मुलगा यशराज हे जात होते. सर्वात पुढे सान्वी होती. अचानकपणे अंधारातून काहीतरी चमकत असल्याचे प्रकाशात पाहिले असता समोर ५०० फुटांवर बिबट्या दिसला. तिच्या अंगावर झेप टाकणार तेवढ्यात हरिश चासकर यांनी आरडाओरड केली. तोपर्यंत बिबट्या एका जागेवरच थांबला होता. नागरिकांची चाहूल लागताच बिबट्याने उसाच्या शेतात धुम ठोकली. काळ आला होता, पण वेळ आली नव्हती, अशीच आमची परिस्थिती झाल्याचे हरिश चासकर यांनी सांगितले.

पुण्यात चार लाख नागरिकांना ई पास

दौलत माने या मेंढपाळाच्या कळपावर दोन दिवसांपूर्वी बिबट्याने हल्ला करून एक मेंढी ठार केली आहे. तसेच, दत्तात्रेय सावळेराम चासकर यांच्या सात फूट संरक्षक भिंतीवरुन उडी मारुन बिबट्याने कुत्रे व एका गाईवर हल्ला करण्याचा प्रयत्न केला, परंतु चासकर यांच्या सतर्कतेमुळे कुत्रे व गाईचा जीव वाचला आहे. लॉकडाउनच्या कालावधीत दुध व्यवसायातून कसेबसे शेतकरी कुटूंबीय उदरनिर्वाह करत आहेत. परंतु, पशुधनावरच बिबट्याने वारंवार हल्ले केल्याने येथील शेतकरी अडचणीत आले आहेत. शेतकऱ्यांना रात्र जागून काढावी लागत आहे. 

खडकवासला धरणक्षेत्रात पावसाची विश्रांती

पशुधनावर वारंवार हल्ले होत आहेत. बिबट्याला पकडण्यासाठी वनविभागाकडे वारंवार मागणी केली. परंतु, अद्यापही बिबट्याला जेरबंद करण्यासाठी वनविभागाने पिंजरा लावला नाही. येत्या दोन दिवसात पिंजऱ्याची व्यवस्था केली नाही, तर जुन्नर वनविभाग कार्यालयासमोर जनावरे बांधून आंदोलन केले जाईल.
 - बाबाजी चासकर, अध्यक्ष, हुतात्मा बाबू गेनू युवा प्रतिष्ठान