भोरमधील शेतकरी आक्रमक, अधिकारी परतले रिकाम्या हाताने

 भोर (पुणे) : भोर शहरातील पिराचा मळा येथील भोरेश्वर औद्योगीक वसाहतीमधील जागेची हद्दनिश्‍चिती करण्यासाठी आलेल्या भूमी अभिलेख विभागाच्या कर्मचाऱ्यांना प्रक्रीया बंद करून रिकाम्या हाताने परत जावे लागले. 

पुण्याच्या इतर बातम्या वाचण्यासाठी येथे क्लिक करा

भोर नगरपालिकेच्या नावावर सातबारा असलेल्या भोरेश्वर औद्योगीक वसाहतीच्या 35 एकर क्षेत्राच्या झालेल्या मोजणीच्या हद्दी निश्‍चित करण्यात येणार होती. भूमी अभिलेख विभागाचे चार जणांचे पथक गुरुवारी (ता.10) सकाळी औद्योगीक वसाहतीमध्ये दाखल झाले. त्यांच्यासमवेत नगरपालिकेचे मुख्याधिकारी विजयकुमार थोरात, भूमिअभिलेख विभागाचे निरीक्षक किशोरकुमार कोरे आणि बंदोबस्तासाठी 20 पोलिस होते. त्यावेळी सुमारे 50 शेतकऱ्यांच्या नातेवाइकांनी हद्द निश्चित करण्यास हरकत घेतली. 

कोरोनाबाधितांसाठी कॅशलेस सेवा, पण लूट सुरूच

आमची जमीन सन 1978 मध्ये नगरपालिकेने अधिग्रहण केली आहे. मात्र, आम्हाला अद्यापही मोबदला मिळालेला नाही. जमिनी ताब्यात घेतलेल्या निवाडाची प्रतही भूसंपादन अधिकारी व नगरपालिकेकडे नाही. त्यानंतर सन 2009 मध्ये इतर हक्कात नाव असलेल्या नगरपालिकेने सर्व जमीन नगरपालिकेच्या नावावर करून घेतली. 35 एकरांपैकी 15 एकर जमीन आजपर्यंत 50 शेतकऱ्यांच्या ताब्यात आहे. मागील वर्षी जून महिन्यात मोजणी करण्यासाठी आलेले कर्मचारी बाठे यांच्यासमोर शेतकऱ्यांनी मोजणीस हरकती घेऊन हरकती अर्ज दाखल केले. परंतु, त्यानंतर डिसेंबर महिन्यात मोजणी झाल्याचे दाखविण्यात आले. मोजणी पूर्ण झाली नाही आणि तरीदेखील हद्दी निश्‍चित करण्यासाठी भूमी अभिलेख विभागाचे कर्मचारी आले आहेत, अशा तक्रारी करून शेतकऱ्यांनी विरोध केला. 

भूमिअभिलेख निरीक्षक किशोरकुमार कोरे यांनी नगरपालिका व संबंधित शेतकरी यांना कागदपत्रांसह आपले म्हणणे मांडण्यास आठ दिवसांची मुदत दिली. त्यानंतर सुनावणी घेऊन पुढील निर्णय घेण्यात येईल, असे सांगितले. त्यानंतर शेतकऱ्यांनी विरोध थांबविला. मात्र, नगरपालिका व भूमापन कर्मचाऱ्यांना रिकाम्या हाताने परत जावे लागले.