उर्से टोल नाक्यावर सहायक पोलीस निरीक्षकाकडून पंधरा हजारच्या लाचेची मागणी 

पुणे : लॉकडाऊनमध्ये चेन्नईहून राजकोटला जाणारा कंटेनर सोडण्यासाठी चालकाची अडवणूक करून 20 हजार रुपयांची लाच मागून तडजोडीे नंतर 15 हजार रुपयांची लाच स्वीकारणाऱ्या महामार्गच्या सहायक पोलिस निरीक्षकावर लाच लुचपत प्रतिबंधक विभागाने (एसीबी) गुन्हा दाखल केला आहे.  पैसे स्वीकारल्यानंतर अधिकाऱ्याला सापळा लावल्याची चाहूल लागताच त्याने आपल्या गाडीतून पळून गेला. 

ताज्या बातम्यांसाठी डाऊनलोड करा ई-सकाळचे ऍप
सहायक पोलीस निरीक्षक सत्यजित रामचंद्र अधटराव (महामार्ग सुरक्षा पथक, वडगाव) याच्यावर या प्रकरणी वडगाव पोलिसांकडे गुन्हा दाखल करण्यात आला आहे. तक्रारदार हे बालरोड लाइन्स यांचे हायड्रोलिक/ एक्सएल गाडीवर चालक असून ते गाडीतून पवनचक्कीचे नेसल घेऊन चेन्नईवरुन  राजकोटला जात होते. तक्रारदार व त्यांचे सहकारी अशा २ गाड्या सत्यजित अधटराव याने पुणे – मुंबई द्रुतगती महामार्गावर उर्से टोलनाक्यावर अडविल्या. ती दोन्ही वाहने 3 मे रोजी लॉकडाऊन उठल्यानंतर  नंतर सोडली जाईल,  असे कंटेनरचालकाला त्याने सांगितले. गाड्या सोडायच्या असतील तर प्रत्येक गाडीचे १० हजार रुपये असे २० हजार रुपये द्यावे लागतील, अशी मागणी केली. चालकांनी याबाबत एसीबीकडे तक्रार केली. 

पुण्याच्या बातम्या वाचण्यासाठी येथे ► क्लिक करा
 त्यानुसार  उर्से टोलनाक्यावर रात्री सव्वा नऊ वाजता सापळा रचण्यात आला. तक्रारदार याच्याकडून सत्यजित अधटराव हा तडजोडी अंती १५ हजार रुपये स्वीकारताना एसीबीच्या जाळ्यात अडकला. त्यानंतर त्याला एसीबीने लावलेल्या सापळ्याचा संशय आल्याने त्याने लाचेची रक्कम टेबलवर फेकून दिली आणि आपल्या कारमध्ये बसून वेगाने तो पुण्याकडे पळून गेला.