सिंहगड, खडकवासल्याला जातायं...500 ची पावती ठरलेली

किरकटवाडी: शनिवार, रविवार तसेच इतर दिवशी खडकवासला धरण, सिंहगड किल्ला परिसरात फिरण्यासाठी येणाऱ्या पर्यटकांना प्रत्येकी पाचशे रुपये दंड करण्यात येणार आहे. तसेच जिल्हाधिकाऱ्यांच्या आदेशाचा भंग केल्याप्रकरणी गुन्हाही दाखल करण्यात येणार असल्याची माहिती हवेली पोलीस ठाण्याचे पोलीस निरीक्षक सदाशिव शेलार यांनी दिली आहे.(FIR Was Lodged with fined Rs 500 Against who visiting Sinhagad, Khadakwasla area)

लॉकडाऊनच्या नियमांमध्ये शिथिलता करण्यात आल्यानंतर मागील रविवारी (दि.13 रोजी) सिंहगड किल्ल्यावर पर्यटकांनी तुफान गर्दी केली होती. प्रत्यक्षात मात्र पुणे जिल्हाधिकारी डॉ. राजेश देशमुख यांच्या आदेशानुसार सिंहगड किल्ला व आजुबाजूची पर्यटन स्थळे अद्यापही पर्यटकांसाठी बंद आहेत. मागील रविवारी झालेली पर्यटकांची गर्दी व त्यामध्ये झालेले कोरोना प्रतिबंधात्मक नियमांचे उल्लंघन या पार्श्वभूमीवर हवेली पोलीसांनी या आठवड्यात नियम मोडून येणाऱ्या पर्यटकांवर कडक कारवाई करण्याची तयारी केली आहे.

हवेली पोलीस ठाण्याचे पोलीस निरीक्षक सदाशिव शेलार यांनी दिलेल्या माहितीनुसार सिंहगड रस्त्यावरील नांदेड फाटा, खडकवासला धरण चौक, डोणजे फाटा,गोळेवाडी चेक पोस्ट, खेड शिवापूरकडून येणारांसाठी कोंढणपूर फाटा अशा ठिकाणी कडक बंदोबस्त व नाकाबंदी करण्यात येणार आहे. त्यासाठी अतिरिक्त पोलीस बंदोबस्त तैनात करण्यात येणार आहे. वाहनांची तपासणी केली जाणार जाणार आहे. फिरण्यासाठी येणाऱ्या प्रत्येक पर्यटकाला पाचशे रुपये दंड तर करण्यात येणार आहेच शिवाय आपत्ती व्यवस्थापन कायदा कलम 188 नुसार गुन्हाही दाखल करण्यात येणार आहे. त्यामुळे कोणीही नियम मोडून फिरण्यासाठी येऊ नये असे आवाहन पोलीस निरीक्षक सदाशिव शेलार यांनी केले आहे.