दौंड शहरात पहिल्यांदाच रानगव्यांच्या जोडीचे दर्शन

दौंड - दौंड शहरातील (Daund City) राज्य राखीव पोलिस दल (एसआरपीएफ) रानगव्यांची (Gaur) जोडी आढळून आली आहे. दौंड शहर किंवा तालुक्यात गव्यांचे अधिवास नसून शहरात पहिल्यांदाच गव्यांचे दर्शन झाले आहे.

दौंड - कुरकुंभ व दौंड - लिंगाळी रस्त्यालगत वन विभागाचे राखीव वन क्षेत्र आहे व त्याला लागूनच एसआरपीएफ गट क्रमांक पाच व गट क्रमांक सातचे मुख्यालय आणि वसाहत आहे. ११ जानेवारी रोजी रात्री साडेअकरा वाजण्याच्या दरम्यान गव्यांची एक जोडी गट क्रमांक पाचच्या जॅागिंग ट्र्रॅक वरून गटाचे समादेशक तथा पोलिस अधीक्षक तानाजी चिखले यांच्या शासकीय निवासस्थानाजळ आली. कर्तव्यावरील पोलिस अंमलदार श्री. कुसाळकर व लाइन पोलिस श्री. घुले यांनी ही जोडी पाहिली. गव्यांना कोणी हटकले नाही त्यामुळे ते पुढे निघून गेले. सदर गवे नेमके कोठे गेले?, याविषयी शोध घेतला जात आहे.

सदर गवे जॅागिंग ट्रॅक वरून आत आले आणि त्यानंतर गोकुळ हॅाटेलच्या दिशेने पुढे निघून गेले आहेत, अशी माहिती समादेशक तानाजी चिखले यांनी दिली.