पुणे जिल्ह्यात पहिल्यांदाच साडेचार हजार कोरोना रुग्ण 

पुणे शहरातील २०९३ जण : ८० रुग्णांचा मृत्यू 
पुणे - गेल्या सहा महिन्यांत काल पहिल्यांदाच  पुणे जिल्ह्यात रविवारी एकाच दिवसात तब्बल ४ हजार ४४७ नवे कोरोना रुग्ण आढळून आले आहेत. यामध्ये पुणे शहरातील २  हजार ९३  रुग्णांचा समावेश आहे. दरम्यान, ८० जणांचा मृत्यू झाला आहे.

पुणे शहरातील सर्वाधिक रुग्णांबरोबरच पिंपरी-चिंचवडमधील १ हजार ४, जिल्हा परिषद कार्यक्षेत्रात ९४५, नगरपालिका क्षेत्रात ३४५  आणि कॅंटोन्मेंट बोर्डाच्या कार्यक्षेत्रात ६० रुग्णांचा समावेश आहे.

ताज्या बातम्यांसाठी डाऊनलोड करा ई-सकाळचे ऍप

गेल्या चोवीस तासांत मृत्यू झालेल्या एकूण रुग्णांमध्ये   पुणे शहरातील सर्वाधिक ४४ रुग्ण आहेत. पिंपरी चिंचवडमधील ३, जिल्हा परिषद क्षेत्रातील २६, नगरपालिका  क्षेत्रातील ७ रुग्णांचा समावेश आहे. आज कॅंटोन्मेंट बोर्डाच्या कार्यक्षेत्रातील एकाही रुग्णाचा मृत्यू झाला नाही.  नवे रुग्ण आणि रुग्णांच्या मृत्यूंची संख्या ही काल (ता. ५) रात्री ९ वाजल्यापासून आज (ता. ६) रात्री नऊ वाजेपर्यंतची आहे.

जगभरातील इतर बातम्या वाचण्यासाठी येथे क्लिक करा

आज दिवसभरात २ हजार ८१९ रुग्ण कोरोनामुक्त झाले आहेत. यामध्ये पुणे शहरातील १ हजार ५६९, पिंपरी चिंचवडमधील ९१३, जिल्हा परिषद कार्यक्षेत्रातील १५५, नगरपालिका क्षेत्रातील १६८ आणि कॅंटोन्मेंट बोर्डातील १४ जण आहेत.

एकूण आकडा २ लाखांच्या आसपास
दरम्यान, आजअखेरपर्यंतच्या एकूण रुग्णांची संख्या आता १ लाख ९३ हजार १३ म्हणजेच दोन लाखांच्या आसपास गेली आहे. आतापर्यंत १ लाख ५३ हजार ९३६ कोरोनामुक्त झाले असून ४ हजार ५७५ जणांचा मृत्यू झाला आहे.