इंदापूरात दोन शिकाऱ्यांना वनविभाकडून अटक

कळस : कळस (ता.इंदापूर) येथील वनातील खोकड प्राण्याची शिकार करण्याच्या उद्देशाने त्याच्या अधिवासाच्या ठिकाणी मांसाचे तुकडे ठेवून शिकारीचा प्रयत्न केल्याच्या आरोपाखाली दोन आरोपी वनविभागाने आज ताब्यात घेतले. या आरोपींना इंदापूर न्यायालयात हजर केले असता त्यांना तीन दिवसांची पोलीस कोठडी सुनावण्यात आल्याचे तालुका वनपरिक्षेत्र अधिकारी राहुल काळे यांनी सांगितले.

ते म्हणाले, ''वनातील वन्यजीवांच्या संरक्षणासाठी आमचे सततचे प्रयत्न सुरू असतात त्या अनुषंगाने कळस परिसरात खोकड प्राण्यांचा अधिवास असलेल्या बिळाजवळ मांसाचे तुकडे ठेवण्यात आल्याचा प्रकार आढळून आला. सदर घटनेची माहिती घेऊन चौकशी केली असता, तालुक्यातील कुंभारगाव येथील दत्ता नामदेव कुंडारे व गणेश बापू भोई या आरोपींनी हा प्रकार केल्याचे उघडकीस आले. त्यांना ताब्यात घेऊन न्यायालयासमोर हजर केले असता तीन दिवसांची पोलीस कोठडी सुनावण्यात आली. शिवाय सदर ठिकाणी काही हाडं व वन्य प्राण्याचा शेपूट मिळून आल्याने ते फाॅरेन्सिक लॅबला तपासणीसाठी पाठविण्यात आले.''

गेल्या काही दिवसांपासून कुंभारगाव परिसरातील अनेक जण पर्यटकांना गाईड म्हणून सेवा देत आहेत. उजनीतील पक्षी दाखवण्याबरोबर तालुक्यातील वनातील प्राणीही दाखवण्याचा बेकायदेशीर व्यवसाय करत आहेत. यासाठी वन विभागाची कसलीही परवानगी घेतली जात नाही. परंतू वनात प्रवेश करून प्राण्यांची शिकारही केली जात असल्याचे या प्रकारामुळे उघडकीस आले आहे.

उपवनसंरक्षक राहूल पाटील व सहाय्यक वनसंरक्षक आशितोष शेंडगे यांच्या मार्गदर्शनाखाली तालुका वनपरिक्षेत्र अधिकारी राहूल काळे, वनपाल अशोक नरूटे, वनरक्षक पूजा काटे आदींनी ही कारवाई केली.