शिक्रापूरातील माजी सरपंचावर खंडणी आणि अपहरणाचा गुन्हा दाखल

शिक्रापूर : दवाखाना चालवायचा असेल तर महिन्याला २५ हजार रुपये हप्ता द्यावा लागेल अशी एका डॉक्टरकडे मागणी केल्यावरुन येथील माजी सरपंच तथा बाजार समितीचे संचालक रामभाऊ सासवडे यांचेवर खंडणीचा गुन्हा (ता. ०१) उशिरा दाखल करण्यात आला. विशेष म्हणजे ज्या डॉक्टरने सासवडेंविरोधात फिर्याद दाखल केली तो बोगस असल्याबाबतची शहनिशा आरोग्य खात्याकडून होत असतानाच या डॉक्टरचे अपहरण केले गेले. शिक्रापूर पोलिसांनी अशाही स्थितीत या डॉक्टरला पुण्यातून ताब्यात घेतले व सासवडेंसह अन्य तिघांविरोधात अपहरणाचा गुन्हा आज (ता. ०२) दाखल करण्यात आला.

पुण्याच्या बातम्या वाचण्यासाठी येथे ► क्लिक करा 

याबाबत शिक्रापूर पोलिसांनी दिलेल्या माहितीनुसार रामेश्वर विठ्ठलराव बंडगर (वय २८, रा. माळीमळा शिक्रापूर, मुळ रा. सोईट, पो. धानोरा, ता. उमरखेड, जि. यवतमाळ) यांना दहा दिवसांपूर्वी माजी सरपंच रामभाऊ सासवडे याने आपल्या कार्यालयात बोलावून घेतले व तुला शिक्रापूर गावच्या हद्दीत हॉस्पिटल चालवायचे असेल तर महिन्याला पंचवीस हजार रुपये द्यावे लागतील म्हणून महिन्याला २५ हजार रुपयांची मागणी केली. म्हणून सासवडे याच्या विरोधात (ता. ०१) उशिरा खंडणीचा गुन्हा दाखल झाला.

दरम्यान फिर्यादी बंडगर याने दिलेली फिर्याद मागे घ्यावी म्हणून त्याचे अपहरण करुन त्याला डांबून ठेवल्याप्रकरणी सासवडे यांचेसह त्यांचे बंधून शामबाप्पू सासवडे, सुभाष सांडभोर, गणेश लोखंडे आदी एकुण चौघांवर अपहणाचा गुन्हा दाखल करण्यात आल्याची माहिती तपास अधिकारी मयुर वैरागकर यांनी दिली.

पुणे : मारटकर खून प्रकरणी कुख्यात गुंड बापू नायरला अटक 

दरम्यान काल रात्री साडेअकराचे सुमारास फिर्यादी बंडगर हे घरी निघाले असताना सुभाष सांडभोर यांनी त्यांना बोलावून घेवून शामबाप्पू सासवडे यांनी त्याला धमकावले व गणेश लोखंडेसह पुण्यातील एका हॉटेलात डांबून ठेवले. सदरची माहिती बंडगर यांनी तपास अधिकारी वैरागकर यांना मेसेज टाकून कळविल्यावरुन वैरागकर व पोलिस निरीक्षक उमेश तावसकर यांनी वेगवेगळ्या पथकांसमवेत जावून बंडगर यांचेसह गणेश लोखंडे यांना ताब्यात घेतले. यातील गणेश लोखंडे याला अटक करण्यात आलेली आहे तर उर्वरित आरोपींना अटक करण्यासाठी पोलिस पथक रवाना झाल्याची माहिती तपास अधिकारी मयुर वैरागकर यांनी दिली.

पुण्याच्या बातम्या वाचण्यासाठी येथे ► क्लिक करा 

फिर्यादी डॉक्टर खरा की, बोगस उद्या समजेल...! 
फिर्यादी रामेश्वर विठ्ठलराव बंडगर हा शिक्रापूरात वैद्यकीय व्यवसाय करतोय. मात्र तो बोगस असल्याची तक्रार पुणे शहर मनसेचे अध्यक्ष कल्पेश यादव यांनी केल्यावरुन बंडगर याचेवर गुन्हा दाखल आहे. मात्र बंडगर याच्या वैद्यकीय प्रमाणपत्रांचे व्हेरीफिकेशन अद्याप झाले नसल्याने ते होताच बंडगर यालाही अटक करण्याचे संकेत शिक्रापूर पोलिसांनी दिले.

(संपादन : सागर डी. शेलार)