Pune Fraud News : जास्त व्याजाचे आमिष दाखवून ठेवीदार महिलेची फसवणूक: पतसंस्थेच्या अध्यक्षासह संचालकांविरुद्ध गुन्हा

पुणे - बॅंकेपेक्षा जास्त व्याज देण्याचे आमिष दाखवून एका ठेवीदार ज्येष्ठ महिलेची १८ लाख रुपयांची फसवणूक केल्याचा प्रकार उघडकीस आला आहे. या प्रकरणी निनाद पतसंस्थेच्या अध्यक्षासह सातजणांविरुद्ध विश्रामबाग पोलिसांनी गुन्हा दाखल केला आहे.

या प्रकरणी एका ज्येष्ठ महिलेने विश्रामबाग पोलिस ठाण्यात फिर्याद दिली आहे. त्यानुसार निनाद पतसंस्थेचे संचालक उदय जोशी, शुभदा जोशी, मयुरेश जोशी, रामलिंग शिवगणे, अशोक कुलकर्णी, वल्लभ जोशी, माजी अध्यक्ष मिथिलेश घोलप, विलास बाम या संशयितांविरुद्ध गुन्हा दाखल केला आहे.

पोलिसांनी दिलेल्या माहितीनुसार, फिर्यादी ज्येष्ठ महिला सहकारनगर भागात राहतात. ज्येष्ठ नागरिकांना एक टक्के जादा व्याज देण्यात येते. पतसंस्थेत मुदतठेव ठेवल्यास बँकेपेक्षा जास्त व्याज देऊ, असे आमिष ज्येष्ठ महिलेला दाखविण्यात आले.

त्यावर ज्येष्ठ महिलेने या पतसंस्थेत सुमारे साडेअकरा लाख रुपयांची मुदतठेव ठेवली. ठेवींची मुदत संपूनही त्यांना बचत खात्यातील रक्कम आणि व्याजासह १८ लाख रुपये परत केले नाहीत. पैसे मागितले असता त्यांना अरेरावी करण्यात आली, असे ज्येष्ठ महिलेने फिर्यादीत म्हटले आहे.