कुकडी नदीपात्र परिसरात पक्षांचा मुक्त संचार

ओझर, ता. २१ : उन्हाळ्याच्या तीव्रतेमुळे धरणातील पाणीसाठा दिवसेंदिवस कमी होत चालला आहे. कुकडी प्रकल्पातून पाण्याचे आवर्तन सुरू नसल्यामुळे नदीच्या पात्रातील पाण्याचा प्रवाह बंद झाला आहे. सध्या कुकडी नदीच्या पश्चिम भागांत ठिकठिकाणच्या बंधाऱ्यांमध्ये, मोठ्या डबक्यांमध्ये काही प्रमाणात पाणीसाठा आहे. अनेक ठिकाणी नदी कोरडी पडल्याचे पहावयास मिळते. कुकडीच्या पाण्यावर मानवा बरोबरच पर्यावरणातील अनेक सजीव प्राण्यांचे जीवन अवलंबून आहे, अनेक जलचर प्राण्यांचे जीवन नदीच्या पाण्यावर अवलंबून आहे. त्यामुळे अनेक पक्षी अन्न पाण्याच्या शोधात स्थलांतर करत असल्याचे पहावयास मिळते. येडगाव धरणाच्या पाणलोट क्षेत्रात अजूनही मुबलक पाणीसाठा आहे. अन्नपाण्याच्या शोधात येणाऱ्या पक्षांची तेथे वर्दळ वाढली आहे. सकाळच्या वेळी लाखोंच्या संख्येने हे पक्षी पश्‍चिमेकडून पूर्वेकडील जलाशयाकडे जातात आणि सायंकाळी तितक्याच मोठ्या संख्येने पूर्वेकडून पश्‍चिमेकडे जातात. हा सर्व प्रवास हे पक्षी नदिपात्रावरील हवाई हद्दीतून करतात. या मार्गावर सायंकाळच्या वेळी लांबच लांब पक्षांच्या रांगा पाहायला मिळतात. पाणकोंबडीच्या आकाराचे काळ्या रंगाचे हे पक्षी शिस्तीत एका रांगेत उडतानाचे दृष्य अतिशय नयनरम्य असते. सकाळी नदी पत्रावरील हवाई मार्गाने जलाशयाकडे जाणे सायंकाळी त्याच मार्गाने घरी जाणे हा या पक्षांचा कित्येक दिवसांपासून नित्यक्रम बनला आहे. त्यांचे हे विलोभनीय दृष्य अनेक पक्षीप्रेमी आपल्या कॅमेऱ्यात कैद करण्यासाठी सायंकाळी त्यांच्या परतीच्या मार्गावर डोळे लावून बसतात. निसर्गाचे वरदान लाभलेले सैन्यातील शिस्तीप्रमाणे वावरणारे पक्षी नागरिकांसाठी कुतूहलाचा विषय बनले आहेत.