काशीळ बोरगाव पोलीस ठाण्यातर्फे ''गणराया अवॉर्ड स्पर्धेचे आयोजन

बोरगाव पोलिसांतर्फे
‘गणराया ॲवॉर्ड’ स्पर्धा

काशीळ, ता. १८ : गणेशोत्सवाच्या पार्श्वभूमीवर बोरगाव पोलिस ठाण्याच्या हद्दीत सामाजिक एकोपा, पर्यावरण रक्षण आणि कायदा-सुव्यवस्था राखण्याच्या उद्देशाने ‘गणराया ॲवॉर्ड २०२६’ पुरस्कार स्पर्धेचे आयोजन केले आहे.
या उपक्रमांतर्गत ‘एक गाव एक गणपती’ ही संकल्पना प्रभावीपणे राबविणाऱ्या गावांचा विशेष गौरव केला जाणार आहे. पोलिस अधीक्षक निखिल पिंगळे, अतिरिक्त पोलिस अधीक्षक डॉ. वैशाली कडुकर आणि पोलिस उपअधीक्षक विपुल पाटील यांच्या मार्गदर्शनाखाली बोरगावचे प्रभारी अधिकारी प्रशांत हुले यांनी या स्पर्धेचे नियोजन केले आहे.
स्पर्धेसाठी धर्मादाय आयुक्त, पोलिस ठाणे आणि ग्रामपंचायतीची पूर्वपरवानगी असणे अनिवार्य आहे. मूल्यांकनामध्ये मूर्तीची उंची तीन ते पाच फूट असणे, पारंपरिक वाद्ये, शिस्त, स्वच्छता, मंडळात सीसीटीव्हीची सोय आणि गुलालमुक्त विसर्जन मिरवणूक या बाबी तपासल्या जाणार आहेत.
याशिवाय रक्तदान शिबिर, वृक्षारोपण, महिला सबलीकरण, गाव स्वच्छता मोहीम, सौरऊर्जेचा वापर तसेच ऐतिहासिक, पौराणिक व वैज्ञानिक देखावे सादर करणाऱ्या मंडळांना प्राधान्य दिले जाईल. विसर्जन मिरवणुकीत डीजेचा वापर केल्यास संबंधित मंडळाचे १५ गुण थेट वजा केले जाणार आहेत.
स्पर्धेच्या परीक्षणासाठी पोलिस उपनिरीक्षक मच्छिंद्रनाथ पाटील, पत्रकार संघाचे तालुकाध्यक्ष धनाजी कणसे, महेंद्र निकम, मंगेश काशीद, तुषार साळुंखे, दीपक मांडवे व केतन जाधव यांची समिती मंडळांची पाहणी करणार आहे. गणेश मंडळांनी प्रशासनाला सहकार्य करावे, असे आवाहन प्रभारी अधिकारी प्रशांत हुले यांनी केले आहे.
-------------------------