पुणे - पुणे महापालिकेतील सत्ताधारी भारतीय जनता पक्षाने पदाधिकारी बदलण्यास सुरुवात केली असून, पहिल्या टप्प्यात सभागृहनेतेपदावर आता धीरज घाटे यांच्याऐवजी नगरसेवक गणेश बिडकर यांची नेमणूक करण्याचा निर्णय पक्षनेतृत्वाने गुरुवारी घेतला. तसे पत्रही बिडकर यांना दिले. पक्षाच्या नगरसेवकांची शुक्रवारी (ता. ११) बैठक होईल आणि त्यानंतर बिडकर यांच्या नावाची अधिकृत घोषणा होईल. मात्र, अन्य पदाधिकारी बदलण्याबाबत कोणताही निर्णय घेण्यात आला नाही.
पुण्याच्या बातम्या वाचण्यासाठी येथे ► क्लिक करा
महापालिकेच्या आगामी निवडणुकांच्या पार्श्वभूमीवर सत्तेतील महत्त्वाच्या पदावरील व्यक्ती बदलली आहे. त्यानिमित्ताने महापालिकेच्या इतिहासात पहिल्यांदाच स्वीकृत नगरसेवकाकडे सभागृहनेतेपद जाणार आहे. महापालिकेतील सत्तेच्या पहिल्या अडीच वर्षांचा कार्यकाळ संपल्यानंतर महापौर, उपमहापौर आणि सभागृहनेतेपद बदलण्यात आले. त्यातून साधारपणे वर्षभरापूर्वी महापौरपद मुरलीधर मोहोळ, उपमहापौर म्हणून सरस्वती शेंडगे आणि सभागृहनेतेपद घाटे यांच्याकडे आले. मात्र, या पदाधिकाऱ्यांना वर्षभरासाठीच संधी असल्याचे सांगत, भाजपमधील इच्छुकांनी पदाधिकारी बदलण्याचा आग्रह नेतृत्वाकडे धरला होता. त्यामुळे पदाधिकारी बदलाबाबत उत्सुकता होती. शेवटी सभागृहनेते म्हणून बिडकर यांच्या नावाला पसंती मिळाल्याचे पक्षांतील नेत्यांनी सांगितले.
स्वीकृत नगरसेवकाला सभागृहात मतदानाचा अधिकार नसतो. अशा सदस्याला पद मिळत नाही, असे ज्येष्ठ नगरसेवक सांगत आहेत. तर, स्वीकृत नगरसेवकाची कोणत्याही पदावर नेमणूक होऊ शकत नाही, असा कायदा नसल्याचे अधिकाऱ्यांनी सांगितले.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.