मापोलीत गुरुवारी विविध कार्यक्रम

फुलवडे, ता. १८ ः मापोली (गणेशवाडी) (ता. आंबेगाव) येथे गुरुवारी (ता. २२) श्री गणेश जयंती उत्सव व सहावा वर्धापन दिन सोहळ्याचे आयोजन श्री गणेश मंदिर विश्वस्त मंडळ, मुंबईकर, पुणेकर व मापोली ग्रामस्थ यांनी केल्याची माहिती अनंत महाराज लोहकरे यांनी दिली. पहाटे काकडा, सकाळी ९ वाजता मांडव डहाळे, ९ ते १२ होमहवन व श्रींचा अभिषेक, दुपारी २ ते ५ भजन, ५ ते ६ हरिपाठ, ६ ते ८ अश्विनी दौंड यांचे हरिकीर्तन, ८ वाजता पुरस्कार वितरण सोहळा, त्यानंतर महाआरती व महाप्रसादानंतर सोहळ्याची सांगता होणार आहे. सोहळ्यात गुणवंत कीर्तनकार भास्कर महाराज जगदाळे, सहाय्यक कृषी अधिकारी ज्ञानेश्वर लोहकरे, गुणवंत नगरसेवक (चाकण) अनिल लोहकरे, गुणवंत पत्रकार मिलिंद भांगरे, गुणवंत अधिकारी हरिश्चंद्र भवारी, दिनेश काटळे यांना माजी सहकार मंत्री तथा आमदार दिलीप वळसे पाटील यांच्या हस्ते पुरस्कार देऊन गौरविण्यात येणार आहे. यावेळी माजी खासदार शिवाजीराव आढळराव पाटील, महंत बेलनाथजी महाराज, बालयोगी गणेशनाथजी महाराज, संभाजी राजे पारधी यांच्यासह इतर मान्यवर उपस्थित राहणार असल्याचे लोहकरे यांनी सांगितले.