Pune traffic updates: पुणेकरांनो लक्ष द्या ! गणेशखिंड रस्त्यावरील ट्रॅफिक जामवर निघाला जालीम उपाय, काय आहेत नवे बदल?

औंध, ता. १४ : गणेशखिंड रस्त्यावरील सावित्रीबाई फुले पुणे विद्यापीठ चौक ते शिवाजीनगर न्यायालयादरम्यान मेट्रोचे काम सुरू असून वाहतूक सुरक्षित व सुरळीतपणे सुरू राहावी यासाठी वाहतुकीत तात्पुरत्या स्वरूपात बदल करण्यात आला आहे. याबाबतचा आदेश पुणे शहर वाहतूक शाखेचे उपायुक्त अमोल झेंडे यांनी काढला आहे.

बाणेर ते शिवाजीनगरकडे जाणारी वाहतूक :

बाणेरकडून येणारी वाहतूक औंध रस्त्यावर वळवून राजभवनसमोरील पंक्चरमधून वळसा (युटर्न) घेऊन पुन्हा सावित्रीबाई फुले पुणे विद्यापीठमार्गे शिवाजीनगरकडे इच्छितस्थळी जातील.

शिवाजीनगर ते औंध :

शिवाजीनगरकडून औंधकडे जाणारे वाहने ही सावित्रीबाई फुले पुणे विद्यापीठ चौकातून सरळ औंधरस्तामार्गे इच्छितस्थळी जातील.

औंध ते शिवाजीनगर :

औंधकडून शिवाजीनगरकडे जाणारी वाहने ही मिलेनियम गेट चतुःश्रृंगी पोलिस ठाण्याच्या गेटमधून सावित्रीबाई फुले पुणे विद्यापीठ परिसर-उजवीकडे वळून-वाय जंक्शन- विद्यापीठ मुख्य प्रवेशद्वारातून बाहेर पडून इच्छितस्थळी जातील.

नागरिकांनी वाहतूक बदल मार्गाचा वापर करून वाहतूक शाखेचे कर्मचारी, स्वयंसेवक यांना सहकार्य करावे असे आवाहन वाहतूक शाखेचे उपायुक्त झेंडे यांनी केले आहे.