पुण्यातील गणेशोत्सव होणार साधेपणाने; गणेश मंडळांचे एकमत

पुणे - जगभरात गेल्या दीड वर्षांपासून कोरोनाने (Corona) हाहाकार सुरु आहे. त्यामुळे यंदाच्या गणेशोत्सव (Ganeshotsav) साधेपणाने आणि ऑनलाईन दर्शनावर (Online Darshan) भर देत सामाजिक उपक्रम राबवत साजरा (Celebrate) केला जाणार आहे. मिरवणुका काढण्यात येणार नाही, आदी मुद्द्यांवर गणेश मंडळांचे महापालिकेत गुरुवारी एकमत झाले.

गणेशोत्सवाच्या पुर्वतयारीसाठी महापालिकेने आयोजित केलेल्या गणेश मंडळांच्या बैठकीत महापौर मुरलीधर मोहोळ, उपमहापौर सुनिता वाडेकर, स्थायी समिती अध्यक्ष हेमंत रासने, आयुक्त विक्रम कुमार, पोलिस आयुक्त अमिताभ गुप्ता , माजी नगरसेवक रविद्र माळवदकर यांच्यासह विविध गणेशोत्सव मंडळाचे पदाधिकारी उपस्थित होते.

दीड वर्षात सर्वच गोष्टींवर बंधने आली आहेत. कोरोनाबाबत जनजगृती करणे गरजेचे आहे. त्यासाठी मंडळांना झिरो बजेट कार्यक्रम द्यावेत. तिसऱ्या लाटेवर मात करण्यासाठी लसीकरण, कोरोना नियम याबाबत समाजप्रबोधन कार्यक्रमाची परवानगी द्यावी, अशी भूमिका गणेशोत्सव मंडळाच्या कार्यकर्त्यांनी मांडली.

महापालिकेने मूर्तीदान या उपक्रमाचा विचार करावा. शहरातून साडेचार लाख मूर्ती विसर्जन होत असतात. त्यासाठी ठोस उपाययोजना कराव्यात. ऑनलाईन कार्यक्रम करावेत, आदी मुद्द्यांवर यावेळी एकमत झाले.

‘पुण्यातील गणेशोत्सव मंडळांनी घेतलेल्या निर्णयाचे याचे महापालिका स्वागतच करत आहे. गणेश मंडळांना उत्सवात कोणतीही अडचण येणार नाही. २०१९ ला जे परवाने देण्यात आले होते. तेच यावर्षी चालणार आहेत. कार्यकत्र्यांना पोलीस स्टेशन येण्याची गरज भासणार नाही. तसेच मूर्ती विसर्जनासाठी महापालिकेकडून योग्य नियोजन करण्यात आले आहे. शहरातील १५ क्षेत्रीय कार्यालयांतर्गत येणाऱ्या शाळा, मैदाने आणि मोकळया जागेत पाण्याचे हौद बांधण्यात येणार आहेत. फिरत्या हौदांची संख्याही वाढवणार आहे,’’ असे महापौर मोहोळ यांनी सांगितले.'

‘पुणे शहरात अजूनही कोरोना रुग्णांची संख्या वाढत आहे. दिवसाला दोनशेच्या आसपास रुग्ण आढळून येत आहेत. महापालिकेच्या वतीने गणेश मंडळांना सहकार्य केले जाईल. मंडळांनीही समाजभान ठेवून उत्सव साधेपणाने साजरा करावा, असे आवाहन पुणे पालिका आयुक्त विक्रम कुमार यांनी केले.