निर्बंधमुक्त मिरवणुकीच्या निषेधार्थ नागरीकांकडून पोलिसांना गुलाब पुष्प देत 'गांधीगिरी'

पुणे : सत्ताधारी राजकीय पक्षाच्या दबाव तंत्रामुळे गणेशोत्सवात अनेक मंडळांनी ध्वनीप्रदुषण नियमांचे उल्लंघन करूनही त्यांच्या विरुद्ध कुठल्याही प्रकारची कारवाई पोलिसांनी केली नाही. त्याबाबत पुणेकरांच्या गटाने सोमवारी पोलिस आयुक्तालयातील अधिकाऱ्यांना गुलाब पुष्प देत निषेध नोंदविला. तसेच विसर्जन मिरवणुकीतील गैरव्यवस्थापनाबाबत पोलिसांना नोटीस देऊन त्याचे उत्तर देण्यात आली आहे. पुणेकरांच्या एका गटाने सोमवारी सहायक पोलिस आयुक्त राजेंद्र गलांडे यांना निवेदन व गुलाबपुष्प दिले. यावेळी डॉ. विश्वंभर चौधरी, मुकुंद किर्दत, निखिल जोशी, उत्पल व्ही. बी., ॲड. अजित देशपांडे, ॲड. अक्षय देसाई, ॲड. तृणाल टोणपे आदी यावेळी उपस्थित होते.

विसर्जन मिरवणुकीत सर्वोच्च न्यायालयाने दिलेल्या आदेशाचे उल्लंघन करण्यात आले. मानाच्या गणपती मंडळांनी विसर्जन मिरवणुकीसाठी घेतलेला वेळ, ढोल ताशा पथकांतील वादकांची संख्या मर्यादित ठेवण्याकडे दुर्लक्ष, मिरवणुकीतील कायदा-सुव्यवस्था राखण्यात आलेले अपयश, ध्वनीवर्धकांचा वापर, प्रखर प्रकाशझोत अशा मुद्यांकडे लक्ष वेधणारी नोटीस पोलिसांना देण्यात आली आहे. या नोटीशीला येत्या सात दिवसात पोलिस प्रशासनाने उत्तर न दिल्यास कायमस्वरुपी तोडगा काढण्यासाठी उच्च न्यायालयात जाण्याचा इशाराही पुणेकर नागरिकांच्या या गटाने दिला आहे