पुरंदर मध्ये होणार शासनाचा मोफत सातबारा वाटप शुभारंभ

खळद - महाराष्ट्र शासनाच्या महसूल व वनविभाग यांच्या वतीने स्वातंत्र्याच्या अमृत महोत्सवी वर्षानिमित्ताने मोफत सुधारित सातबारा वाटप शुभारंभ २ ऑक्टोबर रोजी खळद (ता. पुरंदर) येथील माऊली गार्डन गार्डन मंगल कार्यालय येथे आयोजित करण्यात आला असल्याची माहिती दौंड पुरंदरचे उपविभागीय अधिकारी प्रमोद गायकवाड व पुरंदरच्या तहसीलदार रूपाली सरनोबत यांनी दिली.

या कार्यक्रमाचा शुभारंभ राज्याचे उपमुख्यमंत्री अजित पवार, महसूल मंत्री बाळासाहेब थोरात, गृहमंत्री दिलीप वळसे-पाटील, सार्वजनिक बांधकाम राज्यमंत्री दत्तात्रय भरणे, कृषी राज्यमंत्री विश्वजीत कदम यांच्या शुभहस्ते होणार आहे. तर यावेळी खासदार सुप्रिया सुळे, आमदार संजय जगताप, विभागीय आयुक्त सौरभ राव, अपर आयुक्त निरंजन सुधांशू, जिल्हाधिकारी राजेश देशमुख, अप्पर जिल्हाधिकारी विजय देशमुख, ई फेरफार प्रकल्पाचे राज्याचे समन्वयक रामदास जगताप, कुळ कायदा उपजिल्हाधिकारी संजय तेली आदी मान्यवर उपस्थित असणाऱ्या असल्याची माहिती त्यांनी दिली.

शासनाच्या वतीने सध्या सर्वत्र ई पीक पाहणी मोहीम मोठ्या प्रमाणात सुरू करण्यात आली असून, खळद येथे तहसीलदार रूपाली सरनोबत यांच्या मार्गदर्शनाखाली मंडलाधिकारी प्रभावती कोरे, तलाठी सोमशंकर बनसोडे, सर्व ग्रामपंचायत, सोसायटी पदाधिकारी व ग्रामस्थ प्रयत्न करीत असून २ तारखेला आपण स्वतः केलेल्या नोंदणीचा सुधारित सातबारा नागरिकांना मिळणार असून याबाबत नागरिकांना मोठी उत्सुकता निर्माण झाली आहे.