अमरापूर-मुदत संपलेल्या ग्रामपंचायतींच्या तातडीने निवडणुका घेण्याची सरपंच परिषदेची मागणी-बातमी, फोटो-

‘मुदत संपलेल्या ग्रामपंचायतींच्या
निवडणुका घेण्यात याव्यात’
अमरापूर, ता. २० ः महाराष्ट्रातील मुदत संपलेल्या १४ हजारांहून अधिक ग्रामपंचायतींच्या निवडणुका तातडीने घेण्यात याव्यात आणि मुंबईत ‘सरपंच भवन’ उभारण्यात यावे, या प्रमुख मागण्यांसाठी महाराष्ट्र राज्य सरपंच परिषदेच्या पदाधिकारी शिष्टमंडळाने ग्रामविकास व पंचायतराजमंत्री जयकुमार गोरे यांची मुंबईत भेट घेऊन निवेदन दिले. यावेळी मुदत संपलेल्या ग्रामपंचायतींवरील प्रशासकीय नियुक्त्या, प्रलंबित निवडणुका आणि सरपंचांच्या विविध समस्यांवर सविस्तर चर्चा झाली.​
बैठकीदरम्यान मुदत संपलेल्या ग्रामपंचायतींवर प्रशासक नेमण्याऐवजी तातडीने निवडणुका घेऊन गावामधील कारभार लोकनियुक्त प्रतिनिधींच्या हाती सोपवला जावा. तसेच राज्यभरातून मुंबईत प्रशासकीय कामकाजासाठी व मागण्या मांडण्यासाठी येणाऱ्या सरपंच आणि ग्रामपंचायत प्रतिनिधींच्या सोयीसाठी मुंबईत सुसज्ज सरपंच भवन उभारण्यात यावे, अशी आग्रही मागणी करण्यात आली. ​सरपंच परिषदेने मांडलेल्या या सर्व मागण्यांवर मंत्री गोरे यांनी सकारात्मक भूमिका दर्शवत, शासनस्तरावर योग्य तो पाठपुरावा करण्याचे आश्वासन दिले.
​या शिष्टमंडळात सरपंच परिषदेचे प्रदेशाध्यक्ष दत्ताभाऊ काकडे, प्रदेश कोषाध्यक्ष आनंद जाधव, उत्तर महाराष्ट्र विभागीय अध्यक्ष राजमल भागवत, सोलापूर जिल्हा समन्वयक वीरुपाक्ष घेरडे, बीड जिल्हाध्यक्ष अंबादास गुजर, अहिल्यानगर समन्वयक उमेश भालसिंग, सातारा जिल्हा सचिव शत्रुघ्न धनवडे, राज्य कोअर कमिटी उपाध्यक्ष जे. डी. टेमगिरे, भगवान भालसिंग आदी उपस्थित होते.