ग्रामसुरक्षा दलाने शेतकऱ्यांना मदत करावी

वालचंदनगर, ता. १० : ग्रामसुरक्षा दलाच्या युवकांनी शेतकऱ्यांच्या मनातील ड्रोनची भीती काढून शेतकरी व नागरिकांना मदत करण्याचे आवाहन वालचंदनगर पोलिस ठाण्याचे पोलिस उपनिरीक्षक रतिलाल चौधर यांनी केले.
जंक्शन (ता. इंदापूर) येथे वालचंदनगर पोलिस ठाण्याचे सहायक पोलिस निरीक्षक विक्रम साळुंखे यांच्या मार्गदर्शनाखाली ग्रामसुरक्षा दलाचा मेळावा आयोजित केला होता. यावेळी पोलिस उपनिरीक्षक विजय टिळकीकर उपस्थित होते. यावेळी रतिलाल चौधर यांनी सांगितले की, रात्रीवेळी ड्रोनच्या घिरट्यामुळे ग्रामीण भागातील शेतकरी, नागरिक घाबरले आहेत. ग्रामसुरक्षा दलाच्या युवकांनी रात्री गस्त घालावी. नागरिकांना मदत करावी. तसेच परिसरामध्ये होणाऱ्या चोऱ्या रोखण्यासाठी मदत करावी. काही संशयित व्यक्ती व इतर वस्तु दिसल्यास तातडीने पोलिस ठाण्याशी संपर्क साधावा. यावेळी लासुर्णे परीसरातील ५० ग्रामसुरक्षा दलाच्या युवकांना टी- शर्ट, बॅटरी, काठी व शिट्टी देण्यात आली.

संत तुकाराम महाराज यांचा पालखी सोहळा जुलै महिन्यामध्ये इंदापूर तालुक्यात येणार आहे. पालखी सोहळ्याचे नियोजन, बंदोबस्त व नागरिकांना दर्शनासाठी मदत करण्यासाठी ग्रामसुरक्षा दलाच्या युवकांनी पुढाकार घेण्याचे आवाहन पोलिस उपनिरीक्षक रतिलाल चौधर यांनी सांगितले.