विमानतळासमोर होर्डिंगवर हातोडा 

वडगाव शेरी : विमानतळासमोरील नवीन रस्त्यावर आणि खराडीतील अनधिकृत होर्डिंगवर नगर रस्ता क्षेत्रीय कार्यालयाने कारवाई केली. यासाठी मोठा फौज फाटा तैनात केला होता. ही होर्डिंग रस्त्यालगत असल्याने सुरक्षेचे उपाय करण्यासोबतच मोठ्या क्रेनचीही मदत घेण्यात आली. 

नगर रस्ता क्षेत्रीय कार्यालयाचे सहायक आयुक्त सुनील गायकवाड यांच्या मार्गदर्शनाखाली आकाशचिन्ह विभागाचे प्रशासन अधिकारी हरिश्‍चंद्र कुसाळकर, निरीक्षक मनोहर भुकण, आकाशचिन्ह विभागाचे अभियंता विजय कुमावत यांच्यासह 25 बिगारी, पोलिस आणि मोठ्या क्रेनच्या मदतीने होर्डिंग काढण्यात आले. 

सहायक आयुक्त सुनील गायकवाड म्हणाले, ""अनधिकृत होर्डिंगवरील ही सलग दुसरी मोठी कारवाई आहे. या भागातील सर्व अनधिकृत होर्डिंगवर कारवाई करणार आहे. त्यासाठी कोणाच्याही दबावाला बळी पडणार नाही. आज विमानतळासमोरील संजय पार्क येथील चार आणि खराडीतील काही होर्डिंग हटविली आहेत.''