#HealthIssue इनोव्हेशन’वर वर्षभरात एक रुपयाही खर्च नाही

पुणे - आधुनिक काळातील ‘आयटी हब’, ‘इनोव्हेशन सेंटर’ अशी बिरुदावली मिरवणारी पुणे महापालिका आरोग्य क्षेत्रात एकही नावीन्यपूर्ण प्रयोग करू शकली नसल्याचे ‘राष्ट्रीय आरोग्य अभियान’ने (एनएचएम) अधोरेखित केले आहे. ‘इनोव्हेशन’ या लेखाशीर्षावरील एक रुपयाही गेल्या वर्षभरात महापालिकेने खर्च केला नाही. सर्वांत कमी निधी खर्च झाल्याबाबत कानउघाडणी करणारे पत्रदेखील ‘एनएचएम’ने महापालिका आयुक्तांना पाठविले आहे.

ताज्या बातम्यांसाठी ई-सकाळचे एप डाऊनलोड करा 

पुणेकरांना आरोग्याच्या पायाभूत सुविधा मिळाव्या, त्यांच्यावर उपचारासाठी डॉक्‍टर आणि वैद्यकीय सेवेसाठी कुशल मनुष्यबळ घेता यावे, प्रशिक्षण, क्षमतावृद्धीसाठी ‘एनएचएम’ने महापालिकेला १० कोटी १९ लाख ५० हजार रुपये मंजूर केले होते. त्यापैकी सप्टेंबरपर्यंत जेमतेम २ कोटी ४६ लाख ९४ हजार रुपये म्हणजे मंजूर केलेल्या निधीच्या २४.२२ टक्के खर्च केल्याचे स्पष्ट झाले आहे. शहरातील लोकांना चांगल्या दर्जाच्या आरोग्य सेवा पुरविण्यासाठी दिलेल्या निधीचा वापर होत नसल्याचे पत्र महापालिकेला पाठविले आहे. या बाबत आरोग्य प्रमुख डॉ. रामचंद्र हंचाटे यांच्याशी संपर्क साधण्याचा प्रयत्न केला. पण तो होऊ शकला नाही. 

‘इनोव्हेशन’चा अभाव
पुणे महापालिकेने गेल्या वर्षभरात आरोग्य क्षेत्रात ‘इनोव्हेशन’चा कोणताच प्रयोग केला नाही. त्यामुळे ‘इनोव्हेशन’ या लेखाशिर्षाखाली ‘एनएचएम’ने दिलेले ७५ लाख ४६ हजार रुपयांपैकी एकही रुपया खर्च झाल्याचे दिसत नाही. पुणे हे ‘आयटी हब’ आहे. नवनवीन तंत्रज्ञानाचा उगम या शहरातून होतो. पण असे असतानाही महापालिकेने कोणाशीही समन्वय साधून पुणेकरांना आरोग्याच्या चांगल्या सुविधा देण्याचा प्रयत्न केल्याचे दिसत नाही.

निधी देण्याच्या उद्देशाला हरताळ 
केंद्र सरकारने राष्ट्रीय आरोग्य अभियान अंतर्गत आरोग्यासंबंधी विविध योजना राबविल्या जातात. ‘एनएचएम’ राज्य आरोग्य सोसायटीतर्फे पुणे महापालिकेला निधी उपलब्ध करून देते. पुणेकरांचे आरोग्य चांगले राखण्यासाठी शहरातील दवाखान्याचा दर्जा उंचावला पाहिजे, तसेच आरोग्याशी संबंधित सेवासुविधा नागरिकांना देणे हे हा निधी देण्यामागचा प्रमुख उद्देश आहे. पण या उद्देशालाच महापालिकेने हरताळ फासल्याचे दिसून आले आहे. कारण मिळालेल्या निधीच्या पन्नास टक्केही निधी खर्च झाला नसल्याचे स्पष्ट झाले आहे.