हेरिटेज इंटरनॅशनल स्कूल ठरले ‘स्वच्छ व हरित विद्यालय’

पिरंगुट, ता. ५ : स्वच्छ व हरित विद्यालय उपक्रमांतर्गत शिक्षा मंत्रालयाने आयोजित केलेल्या स्पर्धेत कासार आंबोली (ता. मुळशी) येथील हेरिटेज इंटरनॅशनल स्कूलने जिल्हास्तरावर प्रथम क्रमांक पटकावला. तसेच, राज्यस्तरावर निवड होण्याचा मान मिळवला. जिल्हा उपशिक्षणाधिकारी आस्मा मोमीन शेख यांनी शाळेला पुरस्काराचे सन्मानपत्र प्रदान करून प्राचार्या, शिक्षक व विद्यार्थ्यांचे कौतुक केले.
‘‘हे यश शाळेचे संस्थापक कृष्णा भिलारे, अध्यक्षा संगीता भिलारे, संचालक कुणाल भिलारे तसेच प्रशासकीय प्रमुख यशस्विनी भिलारे, प्राचार्या डॉ. नम्रता झगडे यांच्या मार्गदर्शनाखाली मिळाले. या यशामागे शाळेतील सर्व शिक्षक, शिक्षकेतर कर्मचारी, विद्यार्थी व पालकांचे योगदान असून स्वच्छता, पर्यावरण संवर्धन व शाश्वत उपक्रमांप्रती असलेल्या सामूहिक प्रयत्नांचे हे फलित आहे,’’ असे शाळा व्यवस्थापन समितीने नमूद केले आणि सर्वांचे अभिनंदन करून राज्यस्तरावरही उल्लेखनीय कामगिरी करण्याचा निर्धार व्यक्त केला.