कोरोनाला रोखण्यासाठी ठरणार हा महत्त्वाचा निर्णय 

नारायणगाव (पुणे) : जुन्नर तालुक्‍यातील नारायणगाव, वारूळवाडी परिसरातून पुणे, मुंबई व लगतच्या अन्य शहरात फळ भाजीपाला वाहतूक करणाऱ्या वाहनांचे चालक व मालक यांना येथील मराठी शाळा व समाज मंदिरात क्वारंटाइन करण्याचा निर्णय नारायणगाव, वारूळवाडी ग्रामपंचायत व ग्रामस्थांनी घेतला आहे, अशी माहिती नारायणगावचे सरपंच योगेश पाटे व वारुळवाडीचे उपसरपंच सचिन वारुळे यांनी दिली. 

पन्नास वर्षांपुढील पोलिस कर्मचाऱ्यांसाठी आता... 

जुन्नर तालुक्‍याची महत्त्वाची बाजारपेठ असलेल्या नारायणगाव, वारूळवाडी परिसराची लोकसंख्या सुमारे साठ हजार आहे. या भागातील बहुतेक नागरिक नोकरी, व्यवसायानिमित्ताने पुणे, मुंबई शहरात स्थायिक आहेत. जुन्नर कृषी उत्पन्न बाजार समितीच्या येथील उपबजारातून पुणे, मुंबई येथे सध्या रोज सुमारे दीडशे वाहनांतून टोमॅटो, मेथी व कोथिंबीर या भाजीपाल्याची वाहतूक केली जाते. भाजीपाल्याची वाहतूक करणारे काही चालक येताना प्रती प्रवासी एक हजार रुपये घेऊन चोरटी प्रवासी वाहतूक करत असल्याचे निष्पन्न झाले आहे. जुन्नर तालुक्‍यात मागील दीड महिन्यात पुणे व मुंबई भागातून 39 हजार 509 नागरिक दाखल झाले आहेत. शहरी भागातून येणाऱ्या नागरिकांमुळे ग्रामीण भागात कोरोनाचा संसर्ग टाळण्यासाठी येथील ग्रामपंचायतीने भाजीपाल्याची वाहतूक करणारे चालक, मालक यांना क्वारंटाइन करण्याचा निर्णय आजपासून घेतला आहे. 

पुण्याच्या इतर बातम्या वाचण्यासाठी येथे क्‍लिक करा 

याबाबत सरपंच पाटे यांनी सांगितले की, खबरदारीचा उपाय म्हणून नारायणगाव व वारूळवाडी परिसरातील रस्ते बंद करण्यात आले आहेत. ये- जा करण्यासाठी येथील पूर्व वेस व गुंजाळवाडीकडे जाणारा मुख्य रस्ता खुला ठेवण्यात आला आहे. या रस्त्यावरून जाणाऱ्या वाहनांची नोंद करण्यात येत आहे. 

फौजदारी कारवाई करणार 
याबाबत सहायक पोलिस निरीक्षक अर्जुन घोडे पाटील यांनी सांगितले की, चोरटी प्रवासी वाहतूक करणाऱ्या चालक व मालकांवर गुन्हा दाखल करून वाहन जप्त करण्यात येईल. या प्रकरणी हिवरे येथील एका व्यक्तीवर गुन्हा दाखल करण्यात आला आहे.