Girish Bapat Life Story: टाटांच्या कंपनीत कामगार म्हणून काम करता करता बापट किंगमेकर कसे बनले?

Girish Bapat Life Story: भाजपाचे ज्येष्ठ नेते, खासदार गिरीश बापट यांचे आज दुपारी १२ वाजण्याच्या सुमारास पुण्यातील दीनानाथ मंगेशकर रुग्णालयात निधन झाले.

बापट यांच्यावर संध्याकाळी सातच्या सुमारास वैकुंठ स्मशानभूमीत अंत्यसंस्कार केले जाणार आहेत. गिरीश बापट यांच्या मागे पत्नी, मुलगा, सून आणि नात असा परिवार आहे.

पुणे शहराच्या राजकीय वर्तुळात सर्वपक्षीय नेत्यांसोबत भाजपाचे ज्येष्ठ नेते गिरीश बापट यांचे एक वेगळेच स्थान राहिले आहे. नगरसेवक ते खासदारपदापर्यंत त्यांचा प्रवास हा थक्क करणारा राहिला आहे. (Latest Marathi News)

राजकीय जीवनात प्रवेश करण्यापूर्वी गिरीश बापट टेल्को कंपनीत कामगार म्हणून कामाला देखील होते. त्यांनी कामगारांच्या मागण्यांसाठी अनेकदा लढा दिला होता. त्यावेळी दोन वर्षांच्या काळात आणीबाणीमध्ये बापट 19 महिन्यांसाठी नाशिक जेलमध्ये होते.

1983 ते 2023 पर्यंत पुणे शहराच्या राजकीय वर्तुळात सक्रीय राहणारे गिरीश बापट तीन वेळा नगरसेवक, पाच वेळा आमदार राहिले आहेत. 2014 ते 2019 दरम्यान बापट यांनी फडणवीस सरकारमध्ये मंत्रीपदाची जबाबदारी सांभाळली होती. 2019 पासून ते पुणे लोकसभा मतदार संघाचे प्रतिनिधीत्व करत होते. (Marathi Tajya Batmya)

1983 मध्ये पहिल्याच प्रयत्नात ते पुणे महानगरपालिकेत नगरसेवक पदी विराजमान झाले . सलग तीन टर्म त्यांनी नगरसेवकपद आपल्याकडे ठेवले. विशेष म्हणजे सर्वपक्षीय जनसंपर्काच्या जोरावर गिरीश बापट यांनी महापालिकेत पक्षाची सत्ता नसतानाही स्थायी समितीचं अध्यक्ष मिळवलं.

1995 मध्ये आमदारकीची निवडणूक लढविली अन्‌ पुढे सलग 2014 पर्यंत ते पाच वेळा निवडून आले. 1996 साली त्यांना भाजपाने पुण्यातून लोकसभेची उमेदवारी जाहीर केली होती. पण बापट यांचा पराभव झाला आणि काँग्रेसचे सुरेश कलमाडी खासदार झाले.

गिरीश बापट यांना पुण्याच्या राजकारणात 'सर्वसमावेशक' राजकारणासाठी ओळखलं जायचं. विरोधी पक्षाची सत्ता असली तरी आपले काम साधून घेण्याचे कसब त्यांचाकडे होतं.