मुलासह पत्नीच्या हत्येनंतर पतीची आत्महत्या; खानापूरमध्ये आढळला मृतदेह

पुणे : आई व मुलाच्या खुन प्रकरणातील बेपत्ता असलेल्या वडील आबिद शेख याने आत्महत्या केल्याचे शुक्रवारी सकाळी उघडकीस आले. खडकवासला येथील खानापुर गावाच्या हद्दित शेख याचा मृतदेह आढळला. (Abid Sheikh father commits suicide In mother-son murder case in pune)

धानोरी येथील आलिया आबिद शेख (वय 35) व त्यांचा मुलगा आयान आबिद शेख (वय 6) यांचा खुन करून आयानचा मृतदेह कात्रज येथील नवीन बोगद्याजवळ तर आलिया शेख यांचा मृतदेह सासवड-जेजुरी रस्ता येथे टाकून देण्यात आल्याची घटना मंगळवारी उघडकीस आली होती. याप्रकरणी भारती विद्यापीठ व पुणे ग्रामीण पोलिसांच्या सासवड पोलिस ठाण्यात गुन्हा दाखल करण्यात आला होता. दरम्यान, या घटनेपासून आयानचा वडील आबिद शेख हा बेपत्ता होता.

आबिद शेख याने फिरायला जाण्याच्या निमित्ताने आई व मुलाला सोमवारी बाहेर नेले. त्यानंतर दोघांचा खुन करुन वेगवेगळ्या ठिकाणी मृतदेह टाकून दिले होते. त्यानंतर त्याने त्याच्याकडील कार मार्केटयार्ड जवळ सोडली. त्यानंतर तो रिक्शाने नळस्टॉपला गेला. तेथून तो खानापुर येथे गेला. आई व मुलाच्या खुनाची घटना उघडकीस आल्यानंतर तसेच याबाबत मोठ्या प्रमाणात चर्चा झाली होती. तसेच या खुनाबाबत संशयाची सूई आबिदवर फिरत असल्याने पोलिसांकडून त्याचा कसून तपास सुरु होता.

पोलिस उपायुक्त सागर पाटील, वरिष्ठ पोलिस निरीक्षक जगन्नाथ कळसकर यांच्या मार्गदर्शनाखाली गुन्हे शाखा व भारती विद्यापीठ पोलिसांची 6 पथके आबिदचा शोध घेत होती. दरम्यान, शुक्रवारी सकाळी खानापुर येथे आबिदचा मृतदेह सापडला. पत्नी व मुलाचा खुन केल्यानंतर आबिदने आत्महत्या केली असल्याची शक्यता पोलिसांनी व्यक्त केली आहे.